ترەمپ کات و شوێنی کۆبوونەوەکەی لەگەڵ پووتین ئاشکرا دەکات

ئاڤا نیوز

لە چوارچێوەی هەوڵەکان بۆ دۆزینەوەی چارەسەرێکی دیپلۆماسی بۆ شەڕی ڕووسیا و ئۆکراینا هەر یەک لە دۆناڵد ترەمپ، سەرۆکی ئەمریکا و ڤلادێمیر پووتین، سەرۆکی ڕووسیا  لە ئەلاسکا کۆ دەبنەوە.

 

وێنە گەورەکە: هەوڵەکان بۆ کۆتاییهێنان بە شەڕی  سێ ساڵەی نێوان ڕووسیا و ئۆکراینا بەردەوامە، هەرچەندە تاوەکو ئێستا سێ خولی دانوستانی ڕاستەوخۆی ڕووسیا و ئۆکراینا لە ئیستەنبووڵ ئەنجام دراوە، بەڵام هیچ پێشکەوتنێک بەرەو ئاگربەست بەدەست نەهێنراوە، لەسەر ئەم پرسەش سەرۆکی ئەمریکا پشتڕاستیکردەوە کە نزیکە لە گەیشتن بە ڕێککەوتنێک بۆ کۆتاییهێنان بە شەڕی نێوان هەردوو وڵات.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، کۆبوونەوەیەک لەگەڵ هاوتا ڕووسییەکەی لە ڕۆژی هەینی داهاتوو ڕێککەوتی 15-8-2025،  لە ئەلاسکا لە ئەمریکا ئەنجام دەدات.

 

ئەوەی لەبارەیەوە دەگوترێت: یوری ئوشاکۆڤ، یاریدەدەری سەرۆکی ڕووسیا لەبارەی کۆبوونەوەکەی نێوان هەردوو سەرۆک ئاشکرای کرد، سەرنجی کۆبوونەوەکە لەسەر تاوتوێکردنی بژاردەکانی گەیشتن بە چارەسەری ئاشتیانە بۆ جەنگی ئۆکراینا دەبێت.