ترەمپ هێزی سەربازی لە دژی کارتێلەکانی ماددە هۆشبەرەکان لە ئەمریکای لاتین بەکاردەهێنێت

ئاڤا نیوز
 

بەپێی ڕاپۆرتە هەواڵییەکانی ئەمریکا، دۆناڵد ترەمپ، سەرۆکی ئەمریکا، هەنگاوی ناوە بۆ بەئامانجگرتنی کارتێلەکانی ماددە هۆشبەرەکانی ئەمریکای لاتین بە بەکارهێنانی هێزی سەربازی، ئەمەش دوای ئەوەی واشنتن لە سەرەتای ئەمساڵدا چەندین گرووپی بازرگانیکردن بە ماددە هۆشبەرەکانی وەک ڕێکخراوی "تیرۆریستی" ناساند.

وێنە گەورەکە: ترەمپ لە یەکەم ڕۆژی گەڕانەوەی بۆ کۆشکی سپی لە 20ی مانگی یەکی ئەمساڵدا، فەرمانێکی جێبەجێکاری واژۆ کرد بۆ دروستکردنی میکانیزمێک بۆ ناساندنی کارتێلەکان، کە بە وتەی ئەو هەڕەشەن بۆ ئاسایشیی نیشتمانی ئەمریکا.

زانیاریی بەدەستهاتوو: ڕۆژنامەی نیویۆرک تایمز بڵاویکردەوە، ترەمپ ڕاسپاردەی نهێنی داوەتە پێنتاگۆن بۆ بەکارهێنانی هێزی سەربازی دژی ئەو کارتێلانەی کە وەک ڕێکخراوی تیرۆریستی پۆلێنکراون. هاوکات، ڕۆژنامەی وۆڵ ستریت جۆرناڵ ئاماژەی بەوەدا کە سەرۆکی ئەمریکا داوای ئامادەکردنی بژاردەکانی کردووە، کە لەوانەیە بەکارهێنانی هێزە تایبەتەکان و پێشکەشکردنی پشتیوانی هەواڵگری لەخۆبگرێت و هەر هەنگاوێک بە هەماهەنگی لەگەڵ هاوبەشە بیانییەکان دەبێت.

لێدوانی فەرمی: ئانا کێلی، وتەبێژی کۆشکی سپی ڕایگەیاند، ئەرکی سەرەکی سەرۆک ترەمپ پاراستنی نیشتمانە، هەر بۆیەش ئەو هەنگاوە بوێرانەیەی گرتەبەر بۆ ناساندنی چەندین کارتێل و باند وەک ڕێکخراوی تیرۆریستی بیانی.

لە مانگی دووی ئەمساڵدا، ئەمریکا هەشت گرووپی بازرگانی بە ماددە هۆشبەرەکانی وەک ڕێکخراوی تیرۆریستی ناساند، لەوانە "ترێن دی ئاراگوا"ی ڤەنزوێلا و "کارتێلی سینالۆا"ی مەکسیک.

بۆچوونی لایەنی بەرامبەر: لە وەڵامی ئەم هەواڵانەدا، کلۆدیا شاینباوم، سەرۆکی مەکسیک، ڕایگەیاند، ئێمە هاریکارین، هەماهەنگیمان هەیە، بەڵام هیچ داگیرکارییەک لە ئارادا نابێت. ئەوە بە تەواوی ڕەتکراوەتەوە.