لە بەریتانیا زیاتر لە 300 کەس بەهۆی پشتیوانی لە گرووپی "فەڵەستین ئەکشن" دەستگیرکران

ئاڤا نیوز

پۆلیسی شاری لەندەن ڕایگەیاند، نزیکەی 365 کەسیان لە خۆپیشاندانێکدا دەستگیرکردووە کە بۆ ناڕەزایەتی دەربڕین دژی بڕیاری قەدەغەکردنی گرووپی "فەڵەستین ئەکشن" لە گۆڕەپانی پەرلەمانی بەریتانیا ڕێکخرابوو.

ڕاگەیێنراوی فەرمی: پۆلیسی میترۆپۆلیتان لە ڕاگەیێنراوێکدا لەسەر پلاتفۆرمی ئێکس نووسیویەتی: "تا ئێستا 365 کەسمان لە گۆڕەپانی پەرلەمان دەستگیرکردووە." هەروەها ئاماژەی بەوەشکردووە کە "هێشتا کەسانێک هەن کە دروشمی پشتیوانی لە 'فەڵەستین ئەکشن'ـیان بەدەستەوەیە و ئەفسەرەکانمان بەردەوامن لە دەستگیرکردنی زیاتر."

زانیاریی زیاتر: لە مانگی تەمموزی ڕابردوودا، حکومەتی بەریتانیا گرووپی "فەڵەستین ئەکشن"ـی بەپێی یاسای بەرەنگاربوونەوەی تیرۆر خستە لیستی ڕێکخراوە قەدەغەکراوەکانەوە.

ئەم بڕیارە دوای ئەوە هات کە ئەندامانی گرووپەکە هەڵیانکوتایە سەر بنکەیەکی هێزی ئاسمانیی شاهانە و زیانیان بە چەند فڕۆکەیەک گەیاند، وەک دەربڕینی ناڕەزایەتی بەرامبەر پشتیوانییەکانی بەریتانیا بۆ ئیسرائیل.

ئەوەی پێویستە بیزانیت: بەپێی یاسا نوێیەکە، هەر کەسێک ئەندامی ئەو گرووپە بێت، بە تاوانبار دادەنرێت و ڕووبەڕووی سزای زیندانیکردن دەبێتەوە کە دەگاتە 14 ساڵ.