پلانی ئیسرائیل بۆ داگیرکردنی غەززە کاردانەوەی نێودەوڵەتی لێ دەکەوێتەوە

ئاڤا نیوز

سەرۆکایەتیی فەلەستین و ژمارەیەکی زۆر لە وڵاتانی جیهان ئیدانەی هەوڵی ئیسرائیل دەکەن بۆ داگیرکردنەوەی غەززە، جەخت دەکەنەوە کە سیاسەتەکانی ئیسرائیل هەموو دەرگاکانی بەدیهێنانی ئاسایش و سەقامگیری لە ناوچەکە و جیهان دادەخات.

وێنە گەورەکە: ئەمڕۆ ئەنجوومەنی وەزاریی ئاسایشی ئیسرائیل، پێشنیازی بنیامین ناتانیاهو، سەرۆکوەزیرانی ئیسرائیل بۆ کۆنترۆڵکردنی باکووری شاری غەززە و دابڕاندنی لە فەڵەستین و جێگیرکردنی ئیدارەیەکی بەڕێوەبردن لە لایەن ئیسرائیلەوە پەسەند کرد.

لێدوانی فەرمی: نەبیل ئەبو ڕودەینە، وتەبێژی سەرۆکایەتیی فەلەستین ڕایگەیاند: سیاسەتەکانی ئیسرائیل کە خۆی لە داگیرکردنەوەی غەززە و هەوڵەکانی لکاندنی کەرتی ڕۆژئاوا و بە جولەکەکردنی قودسدا دەبینێتەوە، هەموو دەرگاکانی بەدیهێنانی ئاسایش و سەقامگیری لە ناوچەکە و جیهاندا دادەخات و لەلایەن فەڵەستینەوە ڕەتدەکرێتەوە.

لەلایەکی دیکەوە: هەرچەندە پلانی ئیسرائیل ڕووبەڕووی ڕەخنەی بەرفراوانی نێودەوڵەتی و هەڵوێستی ڕەتکەرەوە بووەوە، بەڵام ئیسرائیل جەختی لەسەر پرۆژەکە کردەوە و نووسینگەی سەرۆکوەزیرانی ئیسرائیل پشتڕاستی کردەوە کە لە نێو ئامانجەکانی پلانەکەدا، سەپاندنی "کۆنترۆڵی ئەمنیی ئیسرائیل بەسەر کەرتی غەززەدا و دامەزراندنی ئیدارەیەکی مەدەنیی جێگرەوەیە کە سەر بە حەماس و دەسەڵاتی فەلەستینیش نەبێت.

ئەوەی پێویستە بیزانیت: هەریەک لە ڕووسیا و تورکیا و وڵاتانی عەرەبی و بەریتانیا، ئوسترالیا، نیوزلەندا، ئەڵمانیا و ئیتاڵیا و ژمارەیەک دەوڵەتی دیکە پلانەکەی ئیسرائیلیان ڕەتکردەوە و بە گەورەترین پێشێلکاری یاسای نێودەوڵەتی ناوزەندیان کرد.