کۆشکی سپی بیر لەوە دەکاتەوە زێلێنسکی بانگهێشتی لووتکەی ئەلاسکا بکات

ئاڤا نیوز

 

کۆشكی سپی بیر لەوە دەکاتەوە ڤۆلۆدیمێر زێلێنسکی، سەرۆکی ئۆکراینا بۆ کۆبوونەوەی لووتکەی نێوان ترەمپ و پووتین بانگێشت بکات کە بڕیارە 15ـی مانگ لە ئەلاسکا بەڕێوەبچێت.

 

وێنە گەورەکە: لە چوارچێوەی هەوڵەکان بۆ دۆزینەوەی چارەسەرێکی دیپلۆماسی بۆ شەڕی ڕووسیا و ئۆکراینا، هەر یەکە لە دۆناڵد ترەمپ، سەرۆکی ئەمریکا و ڤلادێمیر پووتین، سەرۆکی ڕووسیا بڕیارە ڕۆژی هەینی 2025-08-15 لە ئەلاسکا کۆببنەوە و پرسی جەنگی ئۆکراینا تاوتوێ بکەن.

 

زانیاریی بەدەستهاتوو: کەناڵی ئێن بی سی لە زاری بەرپرسێکی باڵای ئەمریکا و سێ کەسی ئاگادار لە بابەتەکە بڵاوی کردووەتەوە،  کۆشکی سپی بیر لە بانگهێشتکردنی ڤۆلۆدیمیر زێلێنسکی، سەرۆکی ئۆکراینا دەکاتەوە بۆ ئەلاسکا، کە بڕیارە دۆناڵد ترەمپ، سەرۆکی ئەمریکا لە 15-8-2025، لەگەڵ ڤلادیمێر پووتین، سەرۆکی ڕووسیا کۆببێتەوە.

 

زانیاریی زیاتر: بە گوتەی بەرپرسێکی کۆشکی سپی، "ترەمپ لاری نییە بۆ ئەنجامدانی لووتکەی سێ لایەنی لە ئەلاسکا لەگەڵ پووتین و زێلێنسکی". بەڵام ئاماژەشی بەوەکرد کە لە ئێستادا کۆشکی سپی, "پلانی کۆبوونەوەی دوو قۆڵی لەسەر داوای پووتین داناوە".