بەهۆی بومەلەرزەکەی تورکیا کەسێک گیانی لەدەستدا

ئاڤا نیوز

ئێوارەی دوێنێ یەکشەممە بومەلەرزەیەکی بەهێز  پارێزگای بالکئەسیری ڕۆژئاوای  تورکیای هەژاند و بەهۆیەوە کەسێک گیانی لەدەستدا و چەند کەسێکی دیکەش برینداربوون.

چیڕۆکی سەرەکی: ڕۆژی یەکشەممە 2025-08-10، بومەلەرزەیەکی بەهێز بە گوڕی 6.1 پلەی ڕێختەر لە قوڵای 11 کیلۆمەتر  پارێزگای بالئەکسیری تورکیای هەژاند و بەهۆیەوە ئافرەتێکی تەمەن 81  ساڵ گیانی لەدەستدا و 29 کەسی دیکەش برینداربوون و زیانی ماددیش بەر زۆرێک لە باڵەخانەکان کەوت.

لێدوانی فەرمی: عەلی یەرلیکایا، وەزیری ناوخۆی تورکیا ڕایگەیاند: ئەو ئافرەتە لە کاتی دەرهێنانی لە ژێر داروپەردووی باڵەخانەیەکی سێ نهۆمی کە تێیدا نیشتەجێیە گیانی لەدەستداوە و هیچ یەک لە بریندارەکان برینەکەیان سەخت نەبووە و هاوکات گوتی، پرۆسەی گەڕان بەدوای قوربانیان کۆتایی هاتووە.

ئەوەی پێویستە بیزانیت: هەریەکە لە شارەکانی ئیستەنبووڵ و ئیزمیر هەستیان بە بوومەلەرزەکەی بالکئەسیر کردووە و هەر دوای بومەلەرزە بەهێزەکە 20 پاشلەرزەی دیکە بە پلەی 3.5 بۆ 4.6 لە ناوچەکە ڕوویانداوە.