ئومێد خۆشناو: مانگی 11 پڕۆژەی فریاگوزاریی خێرای ئاوی هەولێر تەواو دەبێت

ئاڤا نیوز

پارێزگاری هەولێر ئاشكرای دەكات كە ئێستا بە چڕی كار لە بەشی دووەم و كۆتایی پرۆژەی فریاگوزاریی خێرای ئاوی هەولێر دەكرێت و تاوەكو مانگی 11ی ئەمساڵ 100%ی پڕۆژەكە تەواو دەبێت.

چیرۆكی سەرەكی: سەرۆکوەزیران مەسرور بارزانی، لە ڕێککەوتی 8ـی ئەیلوولی 2024، بەردی بناغەی پڕۆژەی فریاگوزاریی خێرایی ئاوی هەولێری دانا كە بە یەکێک لە پرۆژە سەرەکی و ستراتیژییەکانی کابینەی نۆیەمی حکومەتی هەرێمی کوردستان دادەندرێت؛ گرفتی كەمئاوی لە هەولێر بۆ ماوەی 30 ساڵی دیکە چارەسەر دەکات، ناوەڕاستی مانگی حەوتی ئەمساڵ بەشی یەكەمی پڕۆژەكە تەواو بوو و ئێستا دانیشتووانی نزیكەی 30 گەڕەكی شاری هەولێر، ئاوی پڕۆژەكەیان پێدەگات و لە گرفتی كەمئاوی ڕزگارییان بووە.

لێدوانی فەرمی: ئومێد خۆشناو، پارێزگاری هەولێر لە كۆنفرانسێكی ڕۆژنامەوانیدا ڕایگەیاند: لە ماوەی ڕابردوو بەشی یەكەمی پڕۆژەی فریاگوزاریی خێرای ئاوی هەولێر تەواو بوو و ئێستا كار لە بەشی دووەم و كۆتایی دەكرێت، ئەم بەشە زۆر فراوانترە و زۆر بە چڕی بە شەو و ڕۆژ كاری تێدا دەكرێت، تاوەكو مانگی 11ی ئەمساڵ 100%ی پڕۆژەكە تەواو دەبێت و كۆتایی بە گرفتی كەمئاوی دێت.

وردەكاریی پرۆژەكە:

- لەسەر ئاوی زێی گەورە بوونیادنراوە و گوژمەی 470 ملیۆن دۆلار بۆ جێبەجێكردنی تەرخانكراوە.

- هێمن گرووپ كۆمپانیای جێبەجێكاری پرۆژەكەیە و 100%ـی كارەكانی پرۆژەكە بە دەستی كاری خۆماڵی تەواو دەكرێت.

- ڕۆژانە  480 هەزار مەرتر سێجا ئاو بەرهەمدەهێنێت كە دەكاتە سێ ملیۆن و 191 هەزار و 10 بەرمیل ئاوی سازگار و شیرین بە بۆری دەگوازرێتەوە بۆ شاری هەولێر. بەمەش بارگرانی و فشار لەسەر بۆریی ئاوی ئیفراز یەك، دوو، و سێ كەم دەكاتەوە، ئێستا هەر سێ هێڵەكە ڕۆژانە 13 هەزار مەتر سێجا ئاو بەرهەم دەهێنن كە دەكاتە 81 هەزار و 767 بەرمیل.

- پرۆژەكە 20 عەمباری گەورەی ئاوی هەیە، دەتوانێت نزیکەی 300 هەزار مەترسێجا ئاو کۆگا بکات.

- لە یەک کاتژمێردا 20 هەزار مەتر سێجا دەپاڵێوێت.

- ڕۆژانە 480 هەزار مەتر سێجا ئاوی شیرین بەرهەم دەهێنێت.

- تیرەی بۆرییەکان هەزار و 600 ملیم (مەترێک و 60 سانتیم) دەبێت.

- لەگەڵ سێ ئیفرازەکە ڕۆژانە نزیکەی 650 هەزار مەتر سێجا ئاو دابین دەکەن.

 بۆچی گرنگە: ئەو پڕۆژەیە کە لە %60ـی ئاوی هەولێر دابین دەکات، ڕۆژانە 480 هەزار مەتر سێجا ئاوی خواردنەوەی بۆ هاونشتمانیان دابین دەکات و لەماوەی یەک کاتژمێردا نزیکەی 20 هەزار مەتر سێجا ئاو فلتەر دەکات. ئەمە جگە لە پڕۆژەی ئاوی قوشتەپە کە قەزای قوشتەپە و ناحیەی بیستانە و 72 گوندی سنوورەكە لێی سوودمەند دەبن. سەدان بیر دادەخرێن.