گرووپێکی چەکداریی سوننە لەژێر چەتری بەرەی مقاوەمەی ئیسلامی لە سووریا ڕاگەیێنرا

ئاڤا نیوز

لە گۆڕانکارییەکی چاوەڕواننەکراودا لە گۆڕەپانی سووریادا، گرووپێکی چەکداریی نوێ بە ناوی "سەرایا ئەلئەوفیا" دروستبوونی خۆی ڕاگەیاند. ئەوەی ئەم گرووپە لەوانی دیکە جیا دەکاتەوە ئەوەیە کە ئەندامەکانی خۆیان وەک "ڕۆڵەکانی پێکهاتەی سوننە"ـی دڵسۆز بۆ نیشتمان دەناسێنن، بەڵام لە هەمان کاتدا چوونەتە پاڵ "بەرەی مقاوەمەی ئیسلامی لە سووریا"، کە زاراوەیەکە بە شێوەیەکی گشتی بۆ گرووپە چەکدارە نزیکەکان لە ئێران بەکاردێت.

وێنە گەورەکە: گرووپەکانی سەر بە مقاوەمی ئیسلامی لە وڵاتانی عەرەبی لەلایەن ئێرانەوە پاڵپشتی دەکرێن، تاران ئەو گرووپانە لە سیاسەتی دەرەکی و هەرێمایەتی خۆیدا بۆ بەدیهێنانی بەرژەوەندییە ستیراتیژییەکانی خۆی بەکار دەهێنێت.

ڕاگەیێنراوی فەرمی: بەگوێرەی ڕاگەیێنراوێکی فەرمی کە لە 12ـی ئابی 2025 دەرچووە، گرووپەکە لە ژمارەیەک "یەکەی سەربازیی پێشوو لە سوپای عەرەبیی سووریا" لە پارێزگاکانی حەلەب، حەما و حومس پێکهاتووە و لەژێر سەرکردایەتیی کەسێکدایە بە ناوی "ئەبو حەیدەر هاشمی".

ئەوەی پێویستە بیزنیت: لە ڕاگەیێنراوەکەدا، "سەرایا ئەلئەوفیا" ئامانجە سەرەکییەکانی خۆی بەم شێوەیە دیاری کردووە:

1- دەستپێکردنی "جیهادی چەکداری و خەباتی بەرگریکارانە" لەژێر ئاڵای "بەرەی مقاوەمەی ئیسلامی لە سووریا".

2- ڕووبەڕووبوونەوە و ئازادکردنی تەواوی خاکی سووریا لە دوو داگیرکاری: یەکەمیان "داگیرکاریی تورکیی ئەمەوی" و دووەمیان "داگیرکاریی زایۆنی".

پەیامی گرووپەکە: گرووپە نوێیەکە جەختی لەوە کردووەتەوە کە "پشت و پەنای هەموو پێکهاتەکانی گەلی دڵسۆزی سووریا دەبن" و لەگەڵیاندا هەنگاو دەنێن بەرەو ئامانجی "ئازادکردنی نیشتمان، سووریای خۆشەویست".

ئەمەش بزانە: پێشتریش لە 4ـی ئازاری ئەمساڵ، دامەزراندنی بەرەیەکی نوێ بەناوی بەرەی مقاوەمەی ئیسلامی لە سووریا "ئولی بەئس" ڕاگەیێنرا کە ئامانجیان ڕووبەڕووبوونەوەی هەر هەوڵێکە بۆ تێکدانی ئاسایشی وڵات لە ژێر ڕۆشنایی نەبوونی ئەو هێزە سیاسی و کۆمەڵایەتیانەی کە پێشتر سوریایان بەڕێوەبردووە.