سەرۆکی پەرلەمانی عێراق پیرۆزبایی لە پارتی دەکات و ڕۆڵی مێژوویی بەرز دەنرخێنێت

ئاڤا نیوز

سەرۆکی ئەنجوومەنی نوێنەرانی عێراق، بەبۆنەی 79ـەمین ساڵیادی دامەزراندنی پارتی دیموکراتی کوردستانەوە، پەیامێکی پیرۆزبایی ئاراستەی سەرۆک بارزانی و سەرکردایەتیی پارتی کرد.

پەیامی فەرمی: مەحموود مەشهەدانی، وێڕای پیرۆزبایی لە سەرکردایەتی، مەکتەبی سیاسی، ئۆرگانەکان و جەماوەری پارتی و گەلی کورد، دامەزراندنی پارتەکەی لە ساڵی 1946 لەسەر دەستی سەرکردەی نەمر مەلا مستەفا بارزانی، بە "وێستگەیەکی مێژوویی گرنگ" لە ڕەوتی خەباتی نەتەوەیی دا ناوبرد.

سەرۆکی پەرلەمان جەختی لەوە کردەوە کە پارتی "قوربانیدانی گەورەی" لەپێناو بەرگریکردن لە ئازادی و دادپەروەریدا داوە و بەشداریی لە چەسپاندنی بنەماکانی دیموکراسی و فرەیی سیاسیدا لە عێراق کردووە.

لە کۆتاییدا، مەشهەدانی ڕۆڵی بەردەوامی پارتی لە پشتیوانیکردنی پرۆسەی سیاسی و بەهێزکردنی هاوبەشیی نیشتمانیدا بەرز نرخاند و ڕایگەیاند کە ئەم ڕۆڵە خزمەت بە یەکپارچەیی، سەقامگیری و گەشەسەندنی عێراق دەکات.