پۆلیسی چاودێری بۆ ناوچە گەشتارییەکان دادەمەزرێت

ئاڤا نیوز
 
بڕیارە لەسەرجەم ناوچە گەشتیارییەکانی هەرێمی کوردستان بۆ چاودێریکردن و ڕێگریکردن لە سەرپێچی پۆلیسی گەشتیاریی دابمەزێنرێت، هەموو ڕێکارەکان تەواوبوون و تەنیا ماوەتەوە سەر ئەوەی دەستبەکاربن.

وێنە گەورەکە: لە ماوەی کابینەی نۆیەمی حکومەتی هەرێمی کوردستان، پەرەدان بە بنەماکانی کەرتی گەشتیاری یەکێک بووە لە ستراتیژییەکان، لەو چوارچێوەیەشدا بۆ پاراستنی ناوچە گەشتیارییەکان لەسەر میلاکی وەزارەتی ناوخۆ پۆلیس دادەمەزرێن.

لێدوانی فەرمی:  ئیبراهیم عەبدولمەجید، وتەبێژی دەستەی گەشتوگوزاری هەرێمی کوردستان بە ئاڤای ڕاگەیاند، "پرۆسەكە گەیشتووەتە قۆناغی كۆتایی، چاوپێکەوتن کراوە لەگەڵ کەسەکان کە زیاتر لە 165 پۆلیس دەبێت، مەرجە ئەو پۆلیسانە دەرچووی پەیمانگە گەشتیارییەکان بن و سەرجەم ئەوانەی چاوپێکەوتنیان کردووە دەرچووی ئەو بەشەن، کاریان ئەوەیە لەگەڵ لیژنەکانی چاودێری دەبن."

ژمارەکان وادەڵێن: ئەو 165 پۆلیسە بەمشێوەیە بەسەر پارێزگا و ئیدارە سەربەخۆکان دابەش دەبن:-

گەشتوگوزاری هەولێر: 30 پۆلیس

گەشتوگوزاری سلێمانی: 30 پۆلیس

گەشتوگوزاری دهۆک: 25 پۆلیس

گەشتوگوزاری هەڵەبجە: 15 پۆلیس

گەشتوگوزاری سۆران: 20 پۆلیس

گەشتوگوزاری گەرمیان: 15 پۆلیس

گەشتوگوزاری ڕاپەڕین: 15 پۆلیس

گەشتوگوزاری زاخۆ: 15 پۆلیس