پۆڵا سیروان تاڵەبانی: هەندێک پۆست ماوە لەگەڵ پارتی یەکلایی بکەینەوە

ئاڤا نیوز

پرسی پێکهێنانی کابینەی نوێی حکومەتی هەرێمی کوردستان چڕکراوەتەوە، ئەندامێکی ئەنجوومەنی سەرکردایەتیی یەکێتیی نیشتمانیی لەوبارەیەوە دەڵێت: 'هەنگاوەکان لە ڕۆژانی داهاتوو چڕدەکرێنەوە'.

وێنە گەورەکە: ڕۆژی 14-8-2025، هەردوو شاندی دانووستانکاری پارتی و یەکێتی، لە بارەگای مەکتەبی سیاسیی یەکێتی لە هەولێر کۆبوونەوە و جەختیان لەسەر پێکهێنانی کابینەی نوێی حکومەت و دەستبەکاربوونەوەوەی پەرلەمان لە مانگی ئەیلوول کردەوە.

لێدوانی فەرمی: پۆڵا سیروان تاڵەبانی، ئەندامی ئەنجوومەنی سەرکردایەتیی یەکێتیی نیشتمانی کوردستان بە ئاڤا میدیای ڕاگەیاند: ڕێککەوتن لەسەر دیدگای هاوبەش و ستراتیژی و بەڕێوەبردنی حکومەت کراوە، لەسەر زۆرینەی شتەکانیش ڕێککەوتن کراوە، تەنیا هەندێک پۆست ماوە یەکلایی بکرێنەوە.

ئەندامەکەی ئەنجوومەنی سەرکردایەتی یەکێتی وتیشی: یەکێتی و پارتی بیروڕای جیاوازیان لەسەر هەندێک پۆست هەیە، هەنگاوەکانی پێکهێنانی حکومەت چڕتر دەکرێنەوە، لەم ماوەیەدا کۆبوونەوەکانی شاندی دانووستانکار بەردەوام دەبن.

باکگراوند: ڕۆژی 20-10-2024، هەڵبژاردنی پەرلەمانی کوردستان بەڕێوەچوو، لە 2ی 12ی هەمان ساڵ یەکەمین کۆبوونەوەی پەرلەمانی کوردستان بەڕێوەچوو، کە ئەندامانی پەرلەمان سوێندی یاساییان خوارد، تاوەکو ئێستا هیچ کۆبوونەوەیەکی دیکەی پەرلەمان ئەنجامنەدراوە.