میلانیا ترەمپ نامەیەکی ئاشتی بۆ پووتین دەنێرێت؛ داوای پاراستنی منداڵانی کردووە

ئاڤا نیوز

لە کاتی سەردانەکەی ڤلادیمێر پووتین، سەرۆکی ڕووسیا بۆ ئەمریکا، میلانیا ترەمپ، هاوسەری ترەمپ نامەیەکی  ئاشتیی گەیاندووەتە دەستی پووتین.

چیرۆکی سەرەکی:  ڕۆژی هەینی 15-8-2025، کۆوبوونەوەی لووتکەی نێوان سەرۆکی ئەمریکا و سەرۆکی ڕووسیا بە یاوەری شاندی باڵای هەردوو وڵات بەڕێوەچوو، دۆناڵد ترەمپ، سەرۆکی ئەمریکا، نامەیەکی میلانیای هاوسەری گەیاندووەتە ڤلادیمێر پووتین. 

زانیاریی بەدەستهاتوو: ئاژانسی ڕۆیتەرز لە زاری بەرپرسانی کۆشکی سپییەوە بڵاویکردەوە، دۆناڵد ترەمپ، سەرۆکی ویلایەتە یەکگرتووەکانی ئەمریکا لە میانی دیدارەکەیاندا لە ئەلاسکا، نامەیەکی میلانیای هاوسەرەکەی گەیاندووەتە هاوتا ڕووسییەکەی و تێیدا و داوای لە ڤلادیمێر پووتین کردووە کە منداڵان بپارێزێت و پێی گوتووە  دەتوانێت "بە یەک ووشە'' ئەو کارە بکات.

ئەوەی لەو بارەیەوە دەگوترێت: لە نامەکەیدا میلانیا داوای پاراستن و ئاشکرا کردنی چارەنووسی ئەو منداڵانەی کردووە کە لە کاتی شەری ئۆکراینا ڕفێنراون و بە پووتینی گوتووە، پرسی منداڵان هەموو جیاوازییەک لە  جوگرافیا و  حکومەت و ئایدۆلۆژیا و سنوورەکان تێدەپەڕێنێت.

بەشێکی دیکەی نامەکە؛

''وەک دایک و باوک دەبێت نەوەی داهاتوو پەروەردە بکەین و وەک سەرکردە دەبێت پاڵپشتی منداڵەکانمان بکەین  و هەوڵبدەین جیهانێکی ئاسوودەیان بۆ دابین بکەین و ئێستا کاتی ئەوەیە ئەم کارە بکەین و داهاتووی منداڵان پارێزراو بێت''.