دوو "ئاستەنگی" بەردەم دەستپێکردنەوەی هەناردەی نەوتی کوردستان ئاشکرا دەکرێت

ئاڤا نیوز

شارەزایەکی ئابووری دەڵێت؛ ئێستا کۆمپانیا نەوتییە بیانییەکان کە لە هەرێمی کوردستان کاردەکەن، ئاستەنگی سەرەکین لەبەردەم دەستپێکردنەوەی هەناردەی نەوتی کوردستان و پێویستە بەغدا بە نووسراو گەرەنتی ماف و شایستە داراییەکانیان بکات. ئاشکراشی دەکات کە ئاستەنگییەکی دیکە تورکیایە و دەبێت بەغدا بە فەرمی گڵۆپی سەوز بۆ ئەنقەرە هەڵبکات تا ئەویش بەندەری جەیهان بۆ هەناردەی نەوت بکاتەوە.

چیرۆکی سەرەکی: 13ی ئاب وەزارەتی سامانە سرووشتییەکانی حکومەتی هەرێمی کوردستان، بەفەرمی، ڕێككەوتنی نێوان هەردوو حكومەتی هەرێمی كوردستان و حكومەتی عێراقی لەسەر میكانیزمی هەناردەكردنەوەی نەوتی كوردستان ڕاگەیاند.

لێدوانی فەرمی: نەبیل مەرسومی، شارەزایەکی ئابووری لە عێراق ڕایگەیاند، دوو ئاستەنگی لەبەردەم دەستپێکردنەوەی هەناردەی نەوتی کوردستان هەیە، ئاستەنگی یەکەم ڕەزامەندی کۆمپانیا نەوتییەکانە کە ئامادەنین بە 16 دۆلار هەناردەی نەوت دەستپێبکەنەوە بەتایبەتیش کە پرۆسەی گواستنەوەی نەوتەکە و گەیاندنی بۆ بۆرییەکە هەندێکجار پێویستی بە 300 کیلۆمەتر گواستنەوە نەوت بە تانکەر هەیە و ئەوەش خەرجییەکی زیادەیە بۆ پرۆسەکە، جگەلەوەش کۆمپانیا نەوتییەکان داوای بەغدا دان بە گرێبەستە بازرگانییەکانیاندا بنێت و قەرەبووی قەرزەکانیان بکاتەوە، بە نوسراوی فەرمیش ڕێککەوتنیان لەگەڵ بکات کە شایستەکانیان پێدەدات.

دەشڵێت، ئاستەنگی دووەم ڕەزامەندی تورکیایە بە دەستپێکردنەوەی هەناردەی نەوت لەڕێگەی بەندەری جەیهانەوە، هەرچەندە تورکیا پێشتر ڕەزامەندی داوە بەڵام پێویستی بەوەیە عێراق بە فەرمی ئاگاداری بکاتەوە و ئامادەیی بەغدا بۆ دەستپێکردنەوەی هەناردەی نەوتی پێڕابگەیێنێت، ئەو کاتە نەوت دەخرێتە کۆگاکان لە بەندەری جەیهان و سۆمۆش دەست بە فرۆشتنی نەوت دەکات.