لە هەولێر سێ کەس بەهۆی خۆڵبارینەوە ڕەوانەی نەخۆشخانە کراون

ئاڤا نیوز

بەهۆی ئەو خۆڵبارینەی لە شەوی ڕابردووەوە هەولێر گرتووەتەوە، سێ کەس بەهۆی هەناسە تەنگییەوە ڕەوانەی نەخۆشخانە کراون.

چیرۆکی سەرەکی: لە شەوی ڕابردووەوە شەپۆلێکی خۆڵبارین چەند ناوچەیەکی هەرێمی کوردستان گرتووەتەوە، خۆڵبارینەکە بەرەبەیانی ئەمڕۆ چڕتربووەتەوە، تا ئێستاش خۆڵبارینەکە بەردەوامە کەریگەریی شەپۆلەکە کەمبووەتەوە. 

لێدوانی فەرمی: ڕێبین محەممەد، بەرپرسی بەشی فریاکەوتن لە نەخۆشخانەی ڕزگاری بە ئاڤا ڕاگەیاند: لە شەوی ڕابردووەوە سێ کەس بەهۆی هەناسە تەنگییەوە ڕەوانەی نەخۆشخانەی فریاکەوتن کراون، هەرسێکیان چارەسەری پێویستییان بۆ کراوە و ڕەوانەی ماڵەوە کراونەتەوە.

- هەر کەسێک لەکاتی خۆڵبارین بێتە دەرەوە دەبێت ماسک ببەستێت بۆ ئەوەی بەهۆی خۆڵبارینەوە دووچاری هەناسە تەنگی نەبێت، بەتایبەت ئەو کەسانەی نەخۆشی کۆئەندامی هەناسەیان هەیە.

 

گۆشەیەکی دیکەی دیمەنەکە: بەڕێوەبەرایەتیی هاتووچۆی سلێمانی لە ڕاگەیێنراوێكدا هۆشداریی دەداتە شۆفێران كە بە هۆی كەمبوونەوەی ڕادەی بینین، لەپێناو سەلامەتیی گیانی خۆیان باشتر پابەندی ڕێنماییەكان بن و بەرپرسیارانە شۆفێری بكەن.

ئەوەی پێویستە بیزانیت:  بەپێی ڕاگەیێنراوی بەڕێوەبەرایەتیی گشتیی كەشناسی و بوومەلەرزەزانیی هەرێمی كوردستان شەپۆلی خۆڵبارینەکە تاوەكوو چەند كاتژمێرێكی دیكە بەردەوام بێت.