زێلێنسکی لە واشنتنە و ڕووسیا هێرشی نوێ بۆسەر ئۆکراینا ئەنجام دەدات

ئاڤا نیوز

سەرەڕای پێشکەوتنە دیپلۆماسییەکان بۆ کۆتاییهێنان بەشەڕی ڕووسیا و ئۆکراینا، بەڵام ڕووسیا لە هێرشکردنە سەر ئۆکراینا بەردەوامە، ئەمە لەکاتێکدا سەرۆکی ئۆکراینا لە ئەمریکایە و ئەمڕۆ لەگەڵ ترەمپ کۆبوونەوەیان هەیە.

چی ڕوودەدات: ئەمڕۆ دووشەممە ڤۆلۆدێمیر زێلێنسکی، سەرۆکی ئۆکراینا، لەگەڵ چەندین سەرکردەی باڵای ئەورووپا لە کۆشکی سپی دەبێت و لەگەڵ دۆناڵد ترەمپ، سەرۆکی ئەمریکا و کۆدەبنەوە، ڕێگاکانی کۆتاییهێنان بەشەڕ سێ ساڵەی ئۆکراینا لەگەڵ ڕووسیا تاتوێی دەکەن.

زانیاریی بەدەستهاتوو: دەسەڵاتدارانی ئۆکراینا، ئەمڕۆ دووشەممە ڕایانگەیاند، ڕووسیا هێرشی بۆ سەر شاری خارکیڤ لە ڕۆژهەڵاتی ئۆکراینا و ناوچەی سومی لە باکووری ڕۆژهەڵات،  کە هەردووکیان لە سنووری ڕووسیا نزیکن ئەنجامداوە، بەهۆی ئەم هێرشەوە سێ کەس گیانی لەدەستداوە و 17 کەسی دیکەش برینداربوون.

زانیاریی زیاتر: ڕۆژی هەینی ڕابردوو لە ئەلاسکا کۆبوونەوەی لووتکە لەنێوان ترەمپ و پووتین بەڕێوەچوو، دوای ئەم لووتکەیەش ئەمڕۆ ترەمپ میوانداری زێلێنسکی دەکات و ترەمپیش دەڵێت، ڕووسیا و ئۆکراینا دەستبەجێ دەست بە دانوستانی ئاشتی دەکەن و پرسی دابەشکردنی خاک لە گفتوگۆکاندا باس دەکرێت، بەڵام بڕیاری کۆتایی بۆ ئۆکراینا بەجێدەهێڵرێت.