ئاگرەکەی هەڵەبجە سنووری شەش گوندی تێپەڕاندووە

ئاڤا نیوز

ئاگرێکی بەرفراوان ناوچە شاخاوییەکانی کۆکۆیی سنووری هەڵەبجە گرتووەتەوە، بەهۆیەوە کارمەندێکی پۆلیسی دارستان و ژینگە و خۆبەخشێک گیانیان لەدەست داوە، تاوەکو ئێستاش ئاگرەکە کۆنترۆڵ نەکراوە. 

چیرۆکی سەرەکی: لە دوانیوەڕۆی ڕۆژی یەکشەممەوە 17-8-2025، ئاگرێکی بەرفراوان لە سنووری سێ گوندی پارێزگای هەڵەبجە کەوتووەتەوە، بەڵام ئێستا تەشەنەی کردووە و سنووری شەش گوندی ناوچەکەی گرتووەتەوە، ئەگەر کۆنتڕۆڵ نەکرێت لە ماوەیەکی کەمدا دەگاتە شاخی شنروێ و گوندی کاکەییەکان.

لێدوانی فەرمی: عه‌مید عابدین عه‌بدولڕه‌حمان، بەڕێوەبەری بەرگریی شارستانیی هەڵەبجە بە ئاڤای ڕاگەیاند: هەوڵ دەدەین ئاگرەکە لە دۆلێک دا کۆنتڕۆڵ بکەین و نەهێڵین زیاتر تەشەنە بکات، ئەگەر بگاتە شاخی شنروێ کۆنتڕۆڵکردنی کارێکی ئەستەم دەبێت، چونکە شاخەکە زۆر بەرزە، لەگەڵ ئەوەشدا مین و تەقەمەنی جەنگی هەشت ساڵەی عێراق و ئێرانی تێدایە.

لەلایەکی دیکەوە: لەسەر فەرمانی سەرۆکوەزیران مەسرور بارزانی، بە مەبەستی بەدواداچوونی لێکەوتەکانی ئاگرکەوتنەوەکە ڕێبەر ئەحمەد، وەزیری ناوخۆی هەرێمی کوردستان پەیوەندی بە پارێزگار و بەرێوەبەری بەرگریی شارستانیی هەڵەبجەوە کردووە.

زانیاریی زیاتر: وەزیری ناوخۆ ئامادەیی هەموو دامەزراوەکانی حکومەت و وەزارەتی ناوخۆی بۆ بەدەنگەوەچوونی هەڵەبجە پیشانداوە و تیمەکانی وەزارەتی ناوخۆی ڕاسپاردووە، کە کاری پێویست بۆ کوژاندنەوە و کەمکردنەوەی زیانەکان و کۆنترۆڵکردنی ئاگرەکە بکەن.