وتەبێژی وەزارەتی پلاندانانی عێراق بۆ ئاڤا : لەسەر بەرهەمهێنان و هەناردەکردنەوەی نەوت ڕێککەوتنی تەواو کراوە

ئاڤا نیوز

وتەبێژی وەزارەتی پلاندانانی عێراق بەئاڤا میدیای ڕاگەیاند،  لەسەر بەرهەمهێنان و هەناردەکردنەوەی نەوتی هەرێمی کوردستان و داهاتی نانەوتی ڕێککەوتنی تەواو کراوە و ئەمڕۆش  وەزیری نەوت ڕاپۆرتی هەناردەکردنی نەوت دەباتە کۆبوونەوەی ئەنجوومەنی وەزیران.

 

چیرۆکی سەرەکی: لەچوارچێوەی ئەو لیژنە وزارییە، تەکنیکی و یاسایی و داراییەی کە حکومەتی فیدراڵ بۆ چارەسەری گرفت و کێشەکانی نێوان بەغدا و هەولێر پێکیهێنا، ئەمڕۆ سێشەممە، 19-8-2025 لە دیوانی وەزارەتی پلاندانانی عێراق کۆبوونەوەیەکی گرنگ و بەرفراوان بەئامادەبوونی چەندین وەزیر و بەرپرسی حکومی باڵای نێوان هەردوولا  ئەنجامدارا.

 

لێدوانی تایبەت: لەچاوپێکەوتنێکدا لەگەڵ دەروون مەلا ناجی پەیامنێری ئاڤا لە بەغدا، عەبدولزەهرە هینداوی، وتەبێژی وەزارەتی پلاندانانی عێراق ڕایگەیاند: 

- کۆبوونەوەکە زۆر بە ئەرێنی بەڕێوەچوو و هەموو ئامادەبووان بە یەک تیم بۆ چارەسەرکردنی کێشەکان بەشدارییان تێدا کرد.

- لەسەر بەرهەمهێنان و هەناردەکردنەوەی نەوت ڕێککەوتنی تەواو کراوە.

- تارادەیەک ڕێککەوتن لەسەر داهاتی نانەوتی کراوە و بۆ چوونەکان بەپێی یاسای بودجە و یاسای ئیداری مالی لەیەکەوە نزیکن.

- تەنیا لەسەر بەبانکیکردنی مووچەی فەرمانبەرانی هەرێمی کوردستان تێبینی هەیە و ڕێککەوتن لەسەر ئەویش دەکرێت. 

- ئەمڕۆ وەزیری نەوت ڕاپۆرتی هەناردەکردنی نەوت دەباتە کۆبوونەوەی ئەنجوومەنی وەزیران.