عێراق و شیڤرۆنی ئەمریکی بۆ "برەودان و دۆزینەوەی نەوت" ڕێککەوتن

ئاڤا نیوز

سەرۆکوەزیرانی عێراق سەرپەرشتی لێکتێگەیشتنی نێوان وەزارەتی نەوتی فیدراڵ و کۆمپانیای شیڤرۆنی ئەمریکی کرد، بەگوێرەی لێکتێگەیشتنەکەش کۆمپانیا زەبەلاحەکەی بواری وزە بۆ گەشەپێدان بە کێڵگەکان و دۆزینەوەی کێڵگەی نەوتی نوێ لە پارێزگاکانی عێراق دەستبەکار دەکاتەوە.

وێنە گەورەکە: حکومەتی عێراق دەڵێت، ئەوان و ئەمریکا کە خاوەن ڕێککەوتنی ستراتیژیی هاوبەشن، بۆیەش دەیانەوێت لەبوارەکانی بەرهەمهێنان، پاڵاوتن، وەبەرهێنانی غاز و بەکارهێنانی تازەترین تەکنەلۆژیای سەردەم، سوود لە توانای کۆمپانیا ئەمریکییەکان وەربگرن کە لەم بوارەدا خاوەن ئەزموونن، بەتایبەتیش کۆمپانیای شیڤرۆن کە سێیەم گەورەترین کۆمپانیای نەوتی جیهانە و سامانەکەی بە زیاتر لە 270 ملیار دۆلار دەخەمڵێنرێت.

ڕاگەیێنراوی فەرمی: نووسینگەی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیرانی عێراق ئەمڕۆ سێشەممە سەرپەرشتی یاداشتی لێکتێگەیشتنی لەنێوان وەزارەتی نەوت و کۆمپانیای شیڤرۆنی ئەمریکی کرد بۆ پڕۆژەی ناسرییە کە چوار ناوچەی ئاشکراکردنی کێڵگەی نەوتی لە خۆدەگرێت، لەگەڵ گەشەپێدانی کێڵگەی نەوتی بەلەد و کێڵگەی نەوتی دیکە و دۆزینەوەی کێڵگەی نوێی نەوتی دیکە لە ناوچە جیاوازەکانی عێراق.

لە میانەی مەراسیمەکەدا سوودانی قسەی کرد و وتی، خۆشحاڵە بە گەڕانەوەی شیڤرۆن بۆ عێراق و دڵنیاییشدا کە حکومەتی عێراق ڕێبازێکی جیاوازی بۆ مامەڵەکردن لەگەڵ کۆمپانیا گەورەکانی بواری نەوت و بەتایبەت ئەمریکییەکان گرتووەتەبەر تا بێن و لە وڵاتدا وەبەرهێنان بکەن، ستایشی کاری کۆمپانیاکەشی کردووە کە دەیەوێت تەکنەلۆجیای نوێی نەوتی بهێنێتە وڵات و پڕۆژەکانیشی دۆستی ژینگەن.

لەلایەکی دیکەوە: فرانک ماونت، جێگری سەرۆکی کۆمپانیای شیڤرۆن دوای ئەوەی واژۆی لەسەر یاداشتەکە کرد، ڕایگەیاند، کۆمپانیاکەیان خواستی کارکردنی لە عێراق هەیە، بەتایبەتیش کە وڵاتەکە دەرفەتی کاری باشی تێدایە و ئەوان دەیانەوێت هاوبەشییەکی درێژخایەن لەگەڵ بەغدا بونیاد بنێن، لەهەمان کاتیشدا دەیانەوێت ئەزموونی خۆیان بۆ باشترین وەبەرهێنان لە عێراق بەکاربهێنن.