لووتکەی سەربازیی ناتۆ لەبارەی ئۆکراینا بەڕێوەدەچێت

ئاڤا نیوز

لەسەر ئاستی باڵادا، بەرپرسانی سەربازیی ناتۆ کۆدەبنەوە و تاوتوێی دوایین بەرەوپێشچوونەکان سەبارەت بە دۆخی ئۆکراینا دەکەن.

وێنە گەورەکە: بڕیارە ڕۆژی چوارشەممە، سوپاسالاری وڵاتانی ئەندام لە هاوپەیمانیی باکووری ئەتڵەسی (ناتۆ) لەڕێگەی ڤیدیۆوە کۆببنەوە و تیایدا گفتوگۆ لەبارەی جەنگی ئۆکراینا و هەوڵە دیپلۆماسییەکان بکەن.

پەیامی فەرمی: ئەدمیراڵ جۆزێپێ کاڤۆ دراگۆنی، سەرۆکی کۆمیتەی سەربازیی ناتۆ لە پەیامێکدا لە پلاتفۆرمی ئێکس ڕایگەیاند، "لە پەیوەندییەکی ڤیدیۆییدا کۆبوونەوەیەک لەگەڵ سوپاسالاری هەر 32 وڵاتە ئەندامەکەی هاوپەیمانێتییەکە دەکەم".

ئەوەی پێویستە بیزانیت: ئەم کۆبوونەوەیە لە کاتێکدایە کە گفتوگۆکان لەنێوان هاوپەیمانانی کیێڤ بەردەوامن بۆ دیاریکردنی جۆری ئەو گەرەنتییە ئەمنییانەی کە لە ئەگەری گەیشتن بە ڕێککەوتنی ئاشتی لەگەڵ مۆسکۆ، پێشکەش بە ئۆکراینا دەکرێن، بە ئامانجی ڕێگریکردن لە دووبارەبوونەوەی هێرشەکانی ڕووسیا بۆ سەر ئەو وڵاتە.

ئەوەی ئێستا ڕوودەدات: بڕیارە لە ڕۆژانی داهاتوودا زنجیرەیەک کۆبوونەوەی دیکە لە ئاست و شێوازی جیاوازدا ئەنجام بدرێت بۆ گفتوگۆکردن لەسەر گەرەنتییە ئەمنییەکان.

باکگراوند: دوای کۆبوونەوەی لووتکەی ڕۆژی هەینی لە نێوان دۆناڵد ترەمپ، سەرۆکی ئەمریکا و ڤلادیمێر پوتین، سەرۆکی ڕووسیا، گفتوگۆکان بە شێوەیەکی بەرچاو بەرەوپێشچوون کە بەدوایدا کۆبوونەوەیەکی دیکە لە ڕۆژی دووشەممە لە کۆشکی سپی لە نێوان ترەمپ و ڤۆلۆدیمێر زێلینسکی سەرۆکی ئۆکراینا و سەرکردەکانی ئەوروپا بەڕێوەچوو.