کۆشکی سپی: پووتین ڕازی بووە زێلێنسکی ببینێت

ئاڤا نیوز

هەوڵە دیپلۆماسییەکان بۆ کۆتاییهێنان بە جەنگی ڕووسیا و ئۆکراینا بەردەوامە و لەم چوارچێوەیەدا کۆشکی سپی ئاشکرای دەکات، سەرۆکی ڕووسیا ئامادەیی بۆ بینینی زێلینسکی، سەرۆکی ئۆکراینا دەربڕیوە.

چیڕۆکی سەرەکی: دوای کۆبوونەوەی لەگەڵ ڤلادیمێر پووتین، سەرۆکی ڕووسیا لە ئەلاسکا هەفتەی ڕابردوو، ڕۆژی دووشەممە دۆناڵد ترەمپ، سەرۆکی ئەمریکا لە کۆشکی سپی لەگەڵ ڤۆلۆدیمێر زێلینسکی، سەرۆکی ئۆکراینا و بەشێک لە سەرکردەکانی ئەوروپا کۆبووەوە، ئۆکرایناش ئامادەیی بۆ بینینی پووتین بەبێ مەرجی پێشوەختە دەربڕی.

زانیاریی بەدەستهاتوو: کارۆلین لیڤیت، وتەبێژی کۆشکی سپی ڕایگەیاند، پووتین ڕەزامەندی دەربڕیوە بۆ کۆبوونەوە لەگەڵ زێلێنسکی.

زانیاریی زیاتر: ناوبراو دووپاتیکردەوە، تەنیا دۆناڵد ترەمپ خواستی پووتین دەزانێت، چونکە ڕۆژی دووشەممە خۆی لەڕێگەی تەلەفۆنەوە قسەی لەگەڵدا کردووە.