ئەمریكا بۆ شەڕی غەززە چەكی پێویست ناداتە ئیسرائیل

ئاڤا نیوز

 ئەمریکا هەموو ئەو چەک و کەرەستە سەربازییانەی ڕادەستی ئیسرائیل نەکردووە کە بۆ شەڕی غەززە داوای کردووە. بەرپرسێکی سەربازیی ئەمریکا یەکێک لە هۆکارەکان بۆ ئەوە دەگەڕێنێتەوە کە ڕادەستکردنی ئەو کەرەستانە کار دەکاتە سەر ئامادەیی و توانا سەربازییەکانی ئەمریکا. 

لێدوانی فەرمی: جەنەراڵ چارلس بڕاون، سەرۆک ئەرکانی هاوبەشی هێزەکانی ئەمریکا، ڕایگەیاند "لەگەڵ ئەوەدا ئێمە پاڵپشتیمان لە تواناکانیان کردووە، بەڵام هەموو ئەو شتانەیان بە دەست نەگەیشتووە کە داوایان کردبوو. هەندێکی لەبەر ئەوە بووە کە ئەوان داوای شتێکیان کردووە کە ئێمە توانای دابینکردنیمان نیە، نامانەوێت دابینی بکەین یان ئێستا نامانەوێت."  

لەلایەکی دیکەوە: بەشێک لە دیموکراتەکان و عەرەبە ئەمریکییەکان ڕەخنەیان لە ئیدارەی بایدن گرتووە بەوەی بە خێرایی و بێ ئەوەی ئیسرائیل ڕووبەڕووی هیچ بەرپرسیارێتییەک ببێتەوە تەقەمەنی و پێداویستیی بەرگریی ئاسمانیی پێدراوە. 

ئەوەی پێویستە بیزانیت: ئەمریکا ساڵانە بە بەهای 3.8 ملیار دۆلار هاوکاریی سەربازی پێشکەش بە ئیسرائیل دەکات.

وێنە گەورەكە: لەوكاتەوەی لە حەوتی ئۆكتۆبەری ساڵی ڕابردووەوە شەڕی ئیسرائیل و حەماس لە غەززەی فەڵەستین دەستیپێكردووە، ناكۆكی لەنێوان ئیدارەی جۆ بایدن سەرۆكی ئەمریكا و بنیامین نەتانیاهۆ سەرۆكوەزیرانی ئیسرائیل درووستبووە.