کۆشکی سپی بە فەرمی هەژماری تیکتۆکی دانا

ئاڤا نیوز

کۆشکی سپی دەچێتە ناو جیهانی تیکتۆکەوە، بە فەرمی هەژمارێکی تایبەتیان دروستکرد، وەک خۆیان دەڵێن ''بۆ گەیاندنی پەیامەکانی سەرۆکی ئەمریکایە".

چیرۆکی سەرەکی: هەژمارەکە بە ڤیدیۆیەکی دۆناڵد ترەمپ، سەرۆکی ئەمریکا دەستیپێکرد و لە ڤیدیۆکەدا  ترەمپ دەڵێت: هەموو ڕۆژێک  کاتێک لە خەو هەڵدەستم هەوڵ دەدەم  ژیانێکی خۆشتر بۆ هاووڵاتییان دەستەبەر بکەم، من دەنگی ئێوەم. لەگەڵ ئەم بڵاوکراوەیەدا  لە چەند کاتژمێرێکدا هەژمارەکە گەیشتە 71 هەزار  فۆلۆوەرز و سەدان هەزار بینەریشی هەبوو.

لێدوانی فەرمی: لەبارەی هەژمارەکەش کارۆلین لیڤیت، وتەبێژی کۆشکی سپی وتی: ئیدارەی ترەمپ پابەندە بە گەیاندنی سەرکەوتنە مێژووییەکانی سەرۆک ترەمپ، ئەمە شتێکە کە هیچ ئیدارەیەکی پێشوو نەیکردووە.

لەلایەکی دیکەوە: بەشێک لە ئەندامانی کۆنگرێس نیگەرانن لەوەی داتای بەکارهێنەرانی ئەمریکی بگاتە حکومەتی چین، لەکاتێکدا ترەمپ کار لەسەر گرێبەستێک دەکات بۆ فرۆشتنی ئەپەکە بە وەبەرهێنەرانی ئەمریکی.

زانیاریی زیاتر: لە ئەمریکا 170 ملیۆن بەکارهێنەری تیک تۆک هەن و پێشتر چەندین جار ئەمریکا، چینی بە دزینی زانیارییەکانی هاووڵاتییەکانی تۆمەتبار کردبوو.