ئەمینە ئەردۆغان نامەیەک بۆ میلانیا ترەمپ دەنێرێت

ئاڤا نیوز

دوای ئەوەی خانمی یەکەمی ئەمریکا نامەیەکی ئاشتی بۆ سەرۆکی ڕووسیا لە بارەی پاراستنی منداڵان لە جەنگ نارد، خانمی یەکەمی تورکیا داوای لێدەکات نامەیەک بۆ سەرۆکوەزیرانی ئیسرائیلیش بنێرێت.

چیڕۆکی سەرەکی: ڕۆژی هەینی 15-8-2025، لە کاتی کۆوبوونەوەی لووتکەی نێوان سەرۆکی ئەمریکا و سەرۆکی ڕووسیا، دۆناڵد ترەمپ، سەرۆکی ئەمریکا، نامەیەکی میلانیای هاوسەری گەیاندە ڤلادیمێر پووتین و تێیدا داوای لێکرد منداڵان لە کاتی جەنگدا پارێزراوبن، هەر سەبارەت بەم نامەیە ئەمینە ئەردۆغانیش نامەیەک بۆ میلانیا دەنێرێت.

بڵاوکراوەی فەرمی: سەرۆکایەتیی تورکیا نامەکەی ئەمینە ئەردۆغان، خانمی یەکەمی تورکیای بڵاوکردەوە تێیدا ئەمینە داوای لە میلانیا ترەمپ کرد کە هەمان نامە سەبارەت بە خەڵکی غەززە کە بەهۆی گەمارۆ وبۆردومانی بەردەوامی ئیسرائیل توشی کارەساتی مرۆیی بوون بۆ بنیامین نەتانیاهۆ، سەرۆکوەزیرانی ئەو وڵاتە بنێرێت

لە نامەکەی ئەمینەدا هاتووە؛

" وەک دایکێک، ئافرەتێک و مرۆڤێک لە دڵەوە هاوبەشی ئەو هەستانەم کە لە نامەکەتدا بۆ پووتین دەرت بڕین،  دڵنیام ئەو هەستانەی بەرامبەر بە کوشتنی 648 منداڵی ئۆکراینی لە شەری ڕووسیادا نیشانیدا، دەتوانێت هەمان هەست بن بۆ کوشتنی 18 هەزار منداڵی فەڵەستینی بۆیە پێشنیازی ئەوەت بۆ دەکەم کە نامەیەک ئاراستەی نەتانیاهۆ بکەین و داوای کۆتایی هێنان بە قەیرانی غەززەی لێبکەیت و بانگەوازەکەت دەبێتە ڕەنگدانەوەی بەرپرسیارێتییەکی مێژوویی بەرامبەر بە گەلی فەلەستین".