خزمەتگوزارییەكانی شارەوانیی سۆران دەگاتە بلێ و بارزان

ئاڤا نیوز

لەسەر بودجەی وەزارەتی شارەوانی و گەشتوگوزار، پرۆژەی كۆنكرێتكردنی ژمارەیەك شەقامی ناوخۆیی و كۆڵان لە سنووری شارۆچكەی بلێ جێبەجێ كران، هاوكات سیستمی ئاوەڕۆ بۆ شەقامەكان دانرا.

 

چیرۆكی سەرەكی: لە چوارچێوەی جێبەجێكردنی پرۆژە خزمەتگوزارییەكانی سنووری ئیدارەی سۆران لە سێكتەرە جۆراوجۆرەكاندا، ژمارەیەك پرۆژەی دیكە لەو سنوورە لە قۆناغی جێبەجێكردندان، كە تێچووی زۆربەی پرۆژەكانیش لەسەر بودجەی وەزارەتی شارەوانی و بەڕێوەبەرایەتیی شارەوانیی سۆران خەرج دەكرێت.

 

لێدوانی فەرمی: نادر محەممەد، سەرۆكی شارەوانیی بلێ تایبەت بە ئاڤا ڕایگەیاند، پرۆژەی كۆنكرێتكردنی شەقامەكانی ناحیەی بلێ بە گوژمەی 100 ملیۆن دینار جێبەجێكرا، لە ڕۆژانی داهاتووشدا بە گوژمەی 81 ملیۆن دینار ئەو كۆڵان و شەقامانەی ماون كۆنكرێت دەكرێن.

ئاماژەی بەوەشكرد، "ڕەزامەندیی جێبەجێكردنی پرۆژەی جۆراوجۆر بە گوژمەی 2.5 ملیار دینار بۆ ناحیەی بلێ دەرچووە، بەڵام بەهۆی خراپی دۆخی دارایی ئێستای هەرێمی كوردستان نەمانتوانیوە ئەو پرۆژانە جێبەجێ بكەین".

 

زانیاریی زیاتر: شارۆچكەی بلێ پێویستی بە قیرتاوكردنی شەقامەكان و دانانی سیستمی ئاوەڕۆی زیاتر هەیە، سەرەڕای خراپی دۆخی داراییش پرۆژە خزمەتگوزارییەكان لەو شارۆچكەیە نەوەستاوە و بەگوێرەی بودجەی بەردەست، پرۆژەكان بەپێی پێویست، كراون.