"مەترسی سەرهەڵدانەوەی شەڕی ئیسرائیل و ئێران" یەکێکە لە هۆکارەکانی کشانەوەی ئەمریکا لە عێراق

ئاڤا نیوز

ڕۆژنامەی شەرقولئەوسەتی سعوودی دەڵێت: بڕیاری کۆتاییهێنان بە ئەرکی سەربازی ئەمریکا و هاوپەیمانان لە عێراق پەیوەندی بە زیادبوونی مەترسییەکانی سەرهەڵدانەوەی شەڕی نێوان ئێران و ئیسرائیلەوە هەیە، هاوپەیمانێتییەکەی مالیکیش گومانی لە کشانەوەی ئەمریکییەکان هەیە و بە کشانەوەیەکی ڕاستەقینەی نازانێت.

وێنە گەورەکە: بەگوێرەی ڕێککەوتنی ئەمنی لەگەڵ حکومەتی عێراق، لە ئەمڕۆوە ئەمریکا دەستیکردووە بە کۆتاییهێنان بە ئەرکی سەربازیی ‌هێزەکانی لە بنکەکانی لە بەغدا و ئەنبار، و هێزەکانی بەرەو هەولێر و وڵاتێکی دیکەی عەرەبی دەکشێنێتەوە، لەئێستادا ئەمریکا نزیکەی دوو هەزار و 500 سەربازی لە عێراق و 900 سەربازی لە سووریا هەیە، ئەمەش لە چوارچێوەی ئەو هاوپەیمانییەی لە ساڵی 2014 بۆ بەرەنگاربوونەوەی داعش پێکهێنرا.

لێدوانی فەرمی: حوسێن عەلاوی، ڕاوێژکاری سەرۆکوەزیرانی عێراق بە ڕۆژنامەی شەرق ئەلئەوسەتی ڕاگەیاند، هێزە ئەمنییەکان لە ئامادەباشیدان و وڵاتیش ئارامە، ئێستاش بەغدا دەیەوێت پەیوەندییەکانی لەگەڵ واشنتن و وڵاتانی ئەوروپا بۆ پەیوەندی دوو قۆڵی، ڕاهێنان و هەماهەنگی بگۆڕێت. ڕەتیشیدەکاتەوە هیچ مەترسییەک پەیوەست بە گەڕانەوەی داعش بوونی هەبێت.

گۆشەیەکی دیکەی دیمەنەکە: ڕۆژنامەکە پاڵپشت بە سەرچاوە ئەمنییەکانیشی بڵاویکردووەتەوە، هێزەکانی ئەمریکا لە عێراق بەرەو دووبارە خۆڕێکخستنەوە دەڕۆن بۆ خۆگونجاندن لەگەڵ زیادبوونی مەترسییەکانی شەڕی نێوان ئێران و ئیسرائیل، ئەوەش وەڵامدانەوەی نەخشەی مەترسییە ئەمنییەکانە لە عێراق و دەوروبەری.

لە بەرامبەردا: حوسێن مالیکی، ئەندامی فراکسیۆنی دەوڵەتی یاسا لە پەرلەمانی عێراق لە لێدوانێکدا ڕایگەیاند، ئەمریکا نییەتی کشانەوەی لە عێراق نییە و ئەوەی هەیە تەنیا جێگۆڕکێی هێزەکانە لە بنکەیەکەوە بۆ بنکەیەکی دیکە، بەهۆی ئەوەشی ناوەندی ئۆپەراسیۆنەکانی لە سووریا و عێراقەوە سەرچاوە دەگرێت و تا ئوردن درێژ دەبێتەوە، بۆیە کشانەوەیەکی ڕاستەقینەی هێزەکانی ئەمریکا لە عێراق لە ئارادا نییە.