بەرەی گەل: ئەستەمە بێ پارتی هەڵبژاردن بکرێت

ئاڤا نیوز

بەرپرسێکی بەرەی گەل ڕایدەگەیێنێت، بەبێ بەشداریکردنی پارتی دیموکراتی کوردستان ئەستەمە پرۆسەی هەڵبژاردن سەربگرێت.

چیرۆکی سەرەکی: ئەمڕۆ شەممە لە میانی کۆبوونەوەیدا لەگەڵ ئەلینا ڕۆمانسکی، باڵیۆزی ئەمریکا لە عێراق، سەرۆک بارزانی ڕایگەیاند، هەڵبژاردن بە دەستوەردانی نایاسایی و ئەجێندای دەرەکی و  بەبێ بەشداریکردنی پێكهاتەكان ناكرێت.

لێدوانی فەرمی: هەرێم شێرە، بەرپرس لە حیزبی بەرەی گەل کە لاهوور شێخ جەنگی سەرۆکایەتی دەکات، بە ئاڤا نیوزی گوت: "ئەمە واقیعە ئەگەر پارتی بەشداریی نەکات ئەستەمە هەڵبژاردن بکرێت".

لەلایەکی دیکەوە: هەرێم شێرە جەختی کردەوە کە هەموو ئامادەکارییەکیان تەواوکردووە، لەسەر هیچ لایەنێک ناوەستن و سبەی لیستی بەربژێرەکانیان پێشکەشی کۆمیسیۆن دەکەن.

ئەوەی پێویستە بیزانیت: سبەی یەکشەممە دوایین وادەیە بۆ تۆمارکردنی لیستی بەربژێران بۆ هەڵبژاردنی پەرلەمانی کوردستان کە بڕیارە 10-6-2024 بکرێت، تاوەکو ئێستاش پارتی  و یەکێتی لیستی بەربژێرانیان پێشکەشی کۆمیسیۆن نەکردووە.