پڕۆژەی ئاوی فریاگوزاریی خێرا دەگاتە ژمارەیەک گەڕەکی دیکەی هەولێر

ئاڤا نیوز

ئاوی پڕۆژەی فریاگوزاریی خێرای هەولێر دەگاتە چەند گەڕەکێکی دیکەی شاری هەولێر و ئاڤا میدیا دوایین زانیاریی لەبارەی پڕۆژەکە ئاشکرا دەکات.

وێنە گەورەکە: بەهۆی دابەزینی ئاستی ئاوی ژێر زەوی لە هەولێر، لە ماوەی ڕابردوو چەند گەڕەکێک دووچاری کەمئاوی هاتن، ئێستا پڕۆژەی فریارگوزاریی خێرای ئاو گەیشتووەتە بەشێکی هەولێر و شارەکەی بردووەتە قۆناغێکی نوێوە، ئیتر هاووڵاتیان لە کەمئاوی ڕزگاریان دەبێت و پڕۆژەکە کاریگەریی ئەرێنی لەسەر هاونیشتمانیان دروست دەکات.

لێدوانی فەرمی: ئومێد خۆشناو، پارێزگاری هەولێر ڕایگەیاند: كارەكانی قۆناغی دووەمی پڕۆژەی فریاگوزاریی خێرای ئاوی هەولێر، لە ماوەی دوو مانگی داهاتوودا (مانگی 11) تەواو دەبن، ئاو دەگاتە گەڕەکەکانی عەنكاوە، 32ـی پارك، كورانی عەنكاوە، بەحركە، گردجووتیار و سێبەردان و چەندان گەڕەك و گوندی دیکە لە نێوان هەردوو شەقامی 120 و 150 مەتری، دواتر دەست بە قۆناغی سێیەمی پڕۆژەکە دەكرێت.

باکگراوند: سەرۆکوەزیران مەسرور بارزانی، لە ڕێککەوتی 8-9-2024، بەردی بناغەی پڕۆژەی فریاگوزاریی خێرایی ئاوی هەولێری دانا، پڕۆژەکە بە یەکێک لە پڕۆژە سەرەکییەکانی کابینەی نۆیەمی حکومەتی هەرێمی کوردستان دادەندرێت، گرفتی كەمئاوی لە هەولێر بۆ ماوەی 30 ساڵی دیکە چارەسەر دەکات و تێچووەکەی 480 ملیۆن دینار.