پووتین: کۆبوونەوەم لەگەڵ دۆناڵد ترەمپ ئەرێنی بوو؛ لێکتێگەیشتن لەنێوانمان هەبوو

ئاڤا نیوز

سەرۆکی ڕووسیا کۆبوونەوەی لووتکە لەگەڵ دۆناڵد ترەمپ بە کۆبوونەوەیەکی ئەرێنی ناو دەبات و ڕایدەگەیەنێت لێکتێگەیشتن لە نێوانیاندا هەیە. دەڵێت، "هیوادارم ئەم ئاراستەی کارکردن و لێکتێگەیشتنە ببێتە دەروازەیەک بۆ بەدیهێنانی ئاشتی".

وێنە گەورەکە: کۆبوونەوەی نێوان دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا کە بە "لووتکەی ئالاسکا" ناسراوە، لە 15-8-2025 بەڕێوەچوو، ئامانجی کۆبوونەوەکە گفتوگۆکردن بوو لەسەر جەنگی نێوان ڕووسیا و ئۆکراینا و دۆزینەوەی ڕێگەچارەیەک بۆ ڕاگەیاندنی ئاگربەست و کۆتایهێنان بە جەنگ.

لێدوانی فەرمی: پووتین لە وتارێکدا ئەمڕۆ دووشەممە لە لووتکەی ڕێکخراوی هاوکاری شەنگەهای پێشکەشی کرد، ئاماژەی  بە کۆبوونەوەی لەگەڵ ترەمپ کرد و ڕایگەیاند: کۆبوونەوەی لووتکەی ئالاسکا لەگەڵ دۆناڵد ترەمپ کۆبوونەوەیەکی ئەرێنی بوو، گەیشتین بە ئاستێکی لێکتێگەیشتنی باش، هیوادارم ئەم ئاراستەی کارکردن و لێکتێگەیشتنە لەگەڵ سەرۆک ترەمپ ببێتە دەروازەیەک بۆ بەدیهێنانی ئاشتی.

ڤلادیمیر پووتین لە درێژەی وتارەکەیدا هێرشی کردە سەر وڵاتانی ئەورووپا و بە هۆکاری هەڵگیرسان و بەردەوامی جەنگ تۆمەتباری کردن و ڕایگەیاند: ڕووسیا دەستپێشخەری جەنگ نەبوو، بەڵکو دەرئەنجامی کودەتا بوو لە ئۆکرانیا کە ڕۆژئاوا پشتیوانی کرد، وڵاتانی ئەورووپا بە هەوڵدانیان بۆ پەلکێشکردنی کیێڤ بۆ ناتۆ بوونە هۆی دروستکردنی پشێوی و جەنگ.

ئەوەی پێویستە بیزانیت: ئەمساڵ 25ـین لووتکەی ئەنجوومەنی سەرکردەکانی ڕێکخراوی هاریکاریی شەنگهای (SCO) لە شاری تیەنجین لە چین،  لە 31-8-2025 دەستیپێکرد و ئەمڕۆ 1-9-2025 کۆتایی پێدێت.