سوودانی هەردوو کڵێسای "ساعە و تاهیرە" لە مووسڵ دەکاتەوە

ئاڤا نیوز

دوای چەند ساڵێک کارکردن لە نۆژەنکردنەوەیان، ئەمڕۆ محەممەد شیاع سوودانی، بە فەرمی هەردوو کڵێسای "ساعە و تاهیرە"ی لە شاری مووسڵ کردەوە.

چیرۆکی سەرەکی: بەگوێرەی ڕاگەیێنراوێکی نووسینگەی سەرۆکوەزیرانی عێراق، ئەمڕۆ دووشەممە 1-9-2025، سوودانی، هەردوو کڵێسای "ساعە و تاهیرەی گەورە" ی لە شاری مووسڵ کردەوە، ئەمەش دوای ئەوەی چەکدارانی داعش لە ساڵی 2015 ـەدا سەرجەم کەرەستە مێژویی و ئایینییەکانی هەردوو کڵێسەکەیان برد و لە کاتی کۆنترۆڵکردنەوەی پارێزگای نەینەواش وێرانیان کرد.

لێدوانی فەرمی: لە میانی کردنەوەی کڵێسەکان سوودانی ڕایگەیاند: تیرۆریستان هەوڵیاندا وەحشیگەرایی خۆیان بە لێکدانەوەی ئایینیی بێ بنەما نیشان بدەن کە هیچ پەیوەندییەکی بە پیرۆزەکانی ئایینیی ئیسلامەوە نییە.

سوودانی ئاماژەی بەوەکرد، داعش وای دەزانی  وێرانکردنی کڵێسا و ماڵەکانی خودا، مێژووی پێکەوەژیان دەسڕێتەوە، بەڵام ئەنجامەکەی بە تەواوی پێچەوانە بوو، دووبارە نۆژەنکردنەوەی ئەم شوێنە ئایینییانە، پەیامێکە مانەوەی عێراقییەکان لە سایەی پێکەوەژیانی ئاشتییانە و کۆمەڵایەتیدا پشتڕاست دەکاتەوە.

سوودانی جەختی لەوەشکردەوە، عێراقی نوێ، فرەیی نەتەوی و ئایینی وەک قەڵغانێکی پارێزەر بۆ یەکێتی و سەروەری و ئاسایشی وڵات دەگرێتەبەر.