پڕۆژەی فریاگوزاریی خێرای ئاو بە 40 گەڕەکی دیکەی هەولێر دەگات

ئاڤا نیوز


پڕۆژەی فریاگوزاریی خێرای ئاو دەگاتە 40 گەڕەکی دیکەی شاری هەولێر. لەڕێگەی سێ هێڵەوە ئاو بەو گەڕەکانە دەگەیێنرێت کە چەند ساڵێکە بەدەست کەمئاوییەوە دەناڵێنن، قۆناغی کۆتایی پرۆژەکەش دەستپێدەکات.

وێنە گەورەکە: لە ڕابردوودا بەهۆی دابەزینی ئاستی ئاوی ژێر زەوی لە هەولێر چەند گەڕەکێک دووچاری کەمئاوی هاتبوون، بەڵام کابینەی نۆیەم ئەو گرفتەی کۆتایی پێهێنا و ئەم هاوینە ئاوی پڕۆژە ستراتیژیەکە دەگاتە گەڕەکەکان و تا 30 ساڵی دیکە هەولێر کێشەی کەمئاوی نابێت.

زانیاریی تایبەت: هێڵی یەکەم شەقامی ڕەشکین، دیوی ناوەوەی 120 مەتری تاوەکو شەقامی مەخموور و نزیک دەبێتەوە لە شەقامی کەرکووک، هێڵی دووەم تیرەی هەزار و 200 ملم شەقامی گەزنە، بەحرکە تا شەقامی پیرمام لەوێشەوە شەقامی کۆیە، دیوی ناوەوەی 150 مەتری، هێڵی سێیەم 800 ملم بەپێش فڕۆکەخانە ڕەتدەبێت بەرەو شەقامی 120 دێت، دەگاتە شەقامی گەزنە، شەقامی بەحرکە تا شەقامی پیرمام دیوی ناوەوە و دەرەوە سوودمەند دەبن

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای گوت، "قۆناغی کۆتایی پرۆژەی فریاگوزاریی خێرای هەولێر، بەستنەوەی هێڵە سەرەکییەکانی پرۆژەکەیە بە گەڕەکەکانی ناوەوەی شار، تاوەکو مانگی سێ لەسنووری هەر شەش شارەوانییەکە تەواو دەبێت."

گۆشەیەکی دیکەی دیمەنەکە: لە پڕۆژەی فریاگوزاریی خێرای ئاوی هەولێر 20 گوند کەوتوونەتە نێو ماستەرپلانی شاری هەولێر لە پرۆژەکە سوودمەند دەبن.