ڕووسیا کۆنترۆڵکردنی شارێکی دیکەی ئۆکراینا ڕادەگەیێنێت

ئاڤا نیوز

وەزارەتی بەرگریی ڕووسیا کۆنترۆڵکردنی شارێکی دیکەی هەرێمی دۆنێتسک ڕادەگەیەنێت و 24 کاتژمێری ڕابردوو بە سەرکەوتنی گەورە بۆ سوپای ڕووسیا ناودەبات.

وێنە گەورەکە: سەرەڕای کۆبوونەوەی هەریەک لە دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا بۆ کۆتاییهێنان بە جەنگی نێوان ڕووسیا و ئۆکراینا، ڕووسیا و ئۆکراینا لە هێرشی زەمینی و ئاسمانی بۆ سەر یەکتر بەردەوامن و لەگەڵ هەڕەشەی ڤۆلۆدیمێر زیلێنسکی، سەرۆکی ئۆکراینا بۆ هێرشکردنە سەر مۆسکۆ، سوپای ڕووسیا لە ماوەی هەفتەیەکدا  کۆنترۆڵکردنی شارەکانی 'کینژال و ڤیودروڤکا" ی ڕاگەیاند.

بڵاوکراوەی فەرمی: وەزارەتی بەرگریی ڕووسیا ئەمڕۆ سێ شەممە لە بڵاوکراوەیەکی فەرمیدا ڕایگەیاند: "لە ماوەی 24 کاتژمێری ڕابردوودا سوپای وڵات سەرکەوتنی گەورەی بەدەستهێناوە، شاری ڤیودروڤکای هەرێمی دۆنێتسک لە ژێر کۆنترۆڵی سەربازانی ڕووسیا دایە، سوپای ئۆکراینا تووشی شکستێکی گەورە بووە و دەیان تانک و زریپۆش و چەکی ڕۆژئاوایی کە بۆ سوپای ئۆکراینا نێردرابوون تێکشکێنران."

باکگراوند: لە 24-2-2022 جەنگی نێوان ڕووسیا و ئۆکراینا دەستی پێکرد و دوای 3 ساڵ، تاوەکو ئێستاش جەنگ لەنێوان هەردوولا بەردەوامە و دەیان هەزار سەربازیان لە یەکتر کوشتووە.