سەرۆکانی چین و ڕووسیا دوای گفتوگۆی ئابووری و سیاسی باس لە تەمەن درێژی و نەمری مرۆڤ دەکەن

ئاڤا نیوز

هەردوو سەرۆکی ڕووسیا و چین گفتوگۆیان لەسەر تەمەنی درێژ و نەمری کردووە و دەڵێن خەڵک ئێستا سەروو 100 ساڵ دەژین.

ببینە و ببیستە: بەپێی گرتەیەکی ڤیدیۆیی کە لە پەخشی ڕاستەوخۆی تەلەڤیزیۆنی فەرمی چینەوە بڵاوکراوەتەوە،  شی جین پینگ، سەرۆکی چین و ڤلادیمێر پوتین، سەرۆکی ڕووسیا، لە پەراوێزی نماییشی سەربازیدا لە پەکین، باسی چاندنی ئەندامەکانی جەستەیان کردووە وەک ڕێگەیەک بۆ درێژکردنەوەی تەمەن.

پوتین پێشنیازی ئەوەی کردووە کە بەهۆی داهێنانەکانی بایۆتەکنەلۆژیاوە کە زانستێکە بۆ چۆنێتی بەکارهێنانی سیستەمە زیندووەکان یان ئۆرگانیزمەکانە بۆ دروستکردنی بەرهەمە بەسوودەکان بەکاردێت، ژیانی نەمریش دەتوانرێت بەدەست بهێنرێت.

ئەوەی پێویستە بیزانیت: شی و پوتین کە بە دەیان ساڵە لە دەسەڵاتدان. هیچ کامیان نیازییان نییە واز لە دەسەڵاتەکانیان بهێنن و ئەم گفتوگۆی تایبەتەی نێوانیان دەرخەری ئەوەیە کە دیدگایان لە ئابووری و سیاسەت تێپەڕیوە.

گفتوگۆی فەرمی: شی جین پینگ، سەرۆکی چین بە پووتین دەڵێت، لە ڕابردوودا، کەسێک تەمەنی بگەیشتایە سەروو 70 ساڵ زۆر دەگمەن بوو، بەڵام ئەمڕۆ دەڵێن کەسێک لە تەمەنی 70 ساڵیدا هێشتا منداڵە.

پووتینیش پێی دەڵێت، بە پەرەسەندنی بایۆتەکنەلۆژیا، ئەندامەکانی مرۆڤ بە بەردەوامی دەتوانرێن بگوازرێنەوە، و خەڵک دەتوانن گەنجتر ببنەوە، و تەنانەت نەمریش بن.

سەرۆکی چین دەڵێت، پێشبینییەکان بەو جۆرەن کە لەم سەدەیەدا، ئەگەری ئەوە هەیە مرۆڤ تا 150 ساڵیش بژیت.