چوارچێوەی هەماهەنگی ڕژدە لەسەر کاندید کردنی مالیکی

ئاڤا نیوز

لایەنە شیعەکان لە وەڵامێکی توونددا بۆ هۆشدارییەکانی سەرۆکی ئەمریکا، پابەندیی خۆیان بە کاندیدی سەرۆکایەتیی حکومەت دووپات دەکەنەوە و هەر جۆرە دەستوەردانێک لە کاروباری عێراق ڕەتدەکەنەوە.

چیرۆکی سەرەکی: ئێوارەی ئەمڕۆ چوارشەممە، سەرکردەکانی چوارچێوەی هەماهەنگی لە نووسینگەی نووری مالیکی کۆبوونەوە و جەختیان کردەوە ڕژدن لەسەر دەستنیشانکردنی نووری مالیکی بۆ پۆستی سەرۆکایەتیی حکومەتی داهاتووی عێراق.

کۆبوونەوەکە وەک وەڵامێک بوو بۆ قسەکانی دۆناڵد ترەمپ، کە تێیدا لایەنەکان هەڵوێستەکەی ئەمریکایان بە بەزاندنی سەروەری و دەستوەردانی ئاشکرا لە کاروباری ناوخۆیی وڵات ناوبرد.

زانیاریی زیاتر: سەرکردە شیعەکان بڕیاریان دا هەفتەی داهاتوو دانیشتنی پەرلەمان بۆ هەڵبژاردنی سەرۆککۆمار ئەنجام بدرێت، تاوەکو پڕۆسەی ڕاسپاردنی کاندیدەکەیان بۆ پێکهێنانی کابینە خێرا بکرێت.

ئەم بڕیارەی چوارچیوەی هەماهەنگی دوای ئەوە دێت کە سەرۆکی ئەمریکا هۆشداری دابوو، ئەگەر مالیکی هەڵببژێردرێت، واشنتن هەموو هاوکارییە دارایی و سەربازییەکانی بۆ عێراق بە تەواوی دەبڕێت.