ئاری هەرسین: ئەوەی دوێنێ لە پاریس کرا شانازییە بۆ کورد و کوردستان

ئاڤا نیوز

ئاری هەرسین، بەرپرسی لقی چواری پارتی دیموکراتی کوردستان، بە ئاڤا میدیای گوت: پەیوەندی نێوان فەرەنسا و کوردستان، مێژووییە و ئەوەی دوێنێ لە پاریس کرا جێگەی شانازییە.

وێنە گەورەکە: بە بانگهێشتێکی فەرمیی حکومەتی فەرەنسا، سەرۆک بارزانی سەردانی فەرەنسای کرد،  لە ڕێوڕەسمێکی تایبەتیشدا، ڕۆژی هەینی 5/9/2025 بە ئامادەبوونی سەرۆک بارزانی، شەقامێک لە پارکی 'ئۆندرێ سیترۆی' لە شاری پاریسی پایتەختی فەرەنسا بە ناوی "پێشمەرگە" ناونرا.

لێدوانی فەرمی: ئاری هەرسین، بەرپرسی لقی چواری پارتی دیموکراتی کوردستان بە ئاڤا میدیای گوت: کردنەوەی ئەو شەقامە لە پاریس دانپێدانێکی تایبەتە بۆ ناوی پێشمەرگە، ئامادەبوونی سەرۆک بارزانیش وەکو پێشمەرگەیەک و مەرجەعی کوردستان هەواڵێکی زۆر خۆشە و شانازییە بۆ کورد و کوردستان.

- فەرەنساو کوردستان پەیوەندییەکی مێژووییان هەیە لە سەردەمی شۆڕشی ئەیلوولەوە سەردانی بارزانی نەمر و شۆڕشیان کردووە، لە دوای ڕاپەرینیش خاتوو دانیل میتران لە نزیکەوە چاودێری بارودۆخی هەرێمی کوردستانی کردووە و دۆستایەتیی زۆر نزیکی لەگەڵ سەرۆک بارزانی هەبوو.

- دۆستایەتیی کوردستان و فەرەنسا کولتوورێکی دروست کردووە، دەتوانین پێی بڵێین: کولتووری پشتیووانی وڵاتی فەرەنسا لە خەڵکی کوردستان و پێشمەرگە.

- پێویستە پەیوەندی نێوان ئێمە و فەرەنسا هەموو کات نوێبکرێتەوە و بەردەوام بەهێزتر و فراوانتر بکرێت.

ئاری هەرسین ئەمانەشی گوت: پێشمەرگە سیمبوولی بەرخوادان و ئازادای مرۆڤایەتییە و سنوور ناناسێت بۆ پاراستنی مافەکانی مرۆڤ و داکۆکی کردن لە ئازادی.

- سەرۆک بارزانی بە هەموو شێوەیەک هەوڵدەدات بۆ یەکڕیزی ناوماڵی کورد.

لەلایەکی دیکەوە: لە بەشێکی دیکەی قسەکانیدا ئاری هەرسین ڕایگەیاند؛ بەگوێرەی زانیارییەکانی من، پێش مانگی 11 کابینەی نوێی حکومەتی هەرێمی کوردستان پێکدەهێنرێت.

- ئێمە و یەکێتی بەرپرسیارییەتی مێژوویمان لەسەر شانە، پەیوەندیمان زۆر باشە و ئەو ئیرادەیە لە هەردوولا هەیە کابینەی نوێ لە زووترین کات پێکبهێنرێت.