لە سلێمانی پێنج ئامێری بیرهەڵکەندن دەستی بەسەردا گیرا

ئاڤا نیوز

لە ماوەی 24 کاتژمێری ڕابردوودا لە چوار چالاکی جیاواز و لە چوار شوێنی سنووری ‎بەڕێوەبەرایەتیی پۆلیسی دارستان و ژینگەی سلێمانی دەست بەسەر پێنج ئامێری بیرهەڵکەندن داگیرا، چوار کەسیش دەستگیر کراون.

وێنە گەورەکە: بەمەبەستی پارێزگاریکردن لە ئاوی ژێرزەوی هەڵکەندنی بیر لە هەرێمی کوردستان دەبێت بەپێی مەرج و رێنماییەکان و بە مۆڵەتی فەرمی بێت، بەدەر لەوە ڕێگری لیدەکرێت و سەرپێچیکارانیش ڕووبەڕووی ڕێکای یاسایی دەکرێنەوە.

لێدوانی فەرمی: عەمید هێمن کەمەرخان، بەڕێوەبەری ڕاگەیاندنی پۆلیس و دارستانی سلێمانی بە ئاڤا میدیای وت، بەردەوام تیمەکان لە ئەرکدان بۆ ئەوەی هەر کەسێک بیەوێت سەرپێچی بکا و بەبێ مۆڵەت بیر لێبدات ڕێکاری یاسایی لە بەرامبەر دەگیرێتەبەر.

زانیاریی زیاتر: پۆلیسی دارستانی بەکرەجۆ دەستیگرتووە بەسەر ئامێرێک، پۆلیسی  دارستان و ژینگەی سەیدسادق یەک ئامێر، پۆلیسی دارستان و ژینگەی سیتەک ئامێرێک و پۆلیسی دارستان و ژینگەی هەواری شار لەناو شاری سلێمانی دەستیانگرتووە بەسەر ئامێرێکی بیرهەڵکەندن.

ئەمەش بزانە: لە شەش مانگی یەکەمی ئەمساڵ 126 ئامێری هەڵکەندنی بیر و ساڵی رابردووش زیاتر لە 500 ئامێر دەستییان بەسەر داگیراوە.