ئاڤای خەڵك؛ دانیشتووانی گەڕەکی لەتیف هەڵمەت لە کفری داوای چارەسەری کێشەکانیان دەکەن

ئاڤا نیوز

دانیشتووانی گەڕەکی لەتیف هەڵمەت لە شارۆچکەی کفری، لە دەست چەند کێشەیەک بێزارن و داوای چارەسەری بەپەلە دەکەن. ئەم کێشانە ژیانی ڕۆژانەیانی سەخت کردوون و تەندروستی منداڵەکانیشیانی خستووەتە مەترسییەوە.

چیرۆکی سەرەکی: یەکێک لە کێشە سەرەکییەکانی گەڕەکەکە نەبوونی سیستەمی ئاوەڕۆیە، کە بووەتە هۆی بڵاوبوونەوەی بۆنێکی ناخۆش و کۆبوونەوەی پاشماوەکان. کە بەهۆی ئەم پیسییەوە منداڵان تووشی نەخۆشی جۆراوجۆر بوونە.

هاوکات چەند کەسێک کە لە نزیک ماڵان ئاژەڵ بەخێو دەکەن. ئەوان زەویی گشتییان داگیرکردووە و شوێنی بەخێوکردنی ئاژەڵیان دروست کردووە، کە ئەمەش بۆنێکی زۆر ناخۆشی دروست کردووە و بە گوتەی دانیشتووان، تەنانەت لە وەرزی گەرمادا نەتوانراوە ساردکەرەوە کار پێبکرێت بەهۆی ئەو بۆنە ناخۆشەوە.

زانیاریی بەدەستهاتوو: دانیشتووانی گەڕەکەکە ئاماژە بەوە دەکەن کە سێ ساڵ لەمەوبەر پڕۆژەیەک بۆ چاککردنی ئاوەڕۆ بۆ گەڕەکەکەیان دەرچووە و بڕی پارەی پێویستیشی بۆ تەرخان کراوە، بەڵام تا ئێستا هیچ کارێکی جێبەجێکردن ئەنجام نەدراوە.

لێدوانی فەرمی: عەلی خورشید، سەرۆکی شارەوانی کفری، بە ئاڤای ڕاگەیاند، گەڕەکی لەتیف هەڵمەت گەڕەکێکی نوێیە و ماوەیەکی کەمە ئاوەدان کراوەتەوە، بۆیە چەند کێشەیەکی هەیە.
سەبارەت بە کێشەی ئاژەڵدارەکان، سەرۆکی شارەوانی دڵنیایی دا کە بەمزووانە چارەسەر دەکرێت و ئەو کەسانە لەو شوێنە لادەبرێن و دەگوازرێنەوە شوێنێکی دیکە.

لەلایەکی دیکەوە: لەسەر پرسی ئاوەڕۆش، ئاشکرای کرد کە پڕۆژەکەیان ڕەوانەی وەزارەتی دارایی کردووە، بەڵام بەهۆی دۆخی دارایی هەرێمی کوردستانەوە پڕۆژەکە وەستاوە. ناوبراو وتی: "هەر کاتێک پارەمان بۆ خەرج بکرێت، دەست دەکەین بە چاککردنی ئاوەڕۆی گەڕەکەکە."