پڕۆژەی فریاگوزاریی خێرای ئاوى هه‌ولێر ئه‌مریكییه‌كانی سه‌رسام كردووه

ئاڤا نیوز

خالید خۆشناو، خاوەنی هێمن گرووپ چیرۆکی گفتوگۆیەکی لەگەڵ سەرۆکی ژووری بازرگانیی ئەمریکی لەسەر "پڕۆژەی فریاگوزاریی خیرای گەیاندنی ئاوی هەولێر" بۆ ئاڤا میدیا دەگێڕێتەوە.

وێنە گەورەكە: پڕۆژەی فریاگوزاریی خێرای ئاوی هەولێر بە یەكێك لە پڕۆژە گرنگ و ستراتیژییەكانی كابینەی نۆیەمی حكومەتی هەرێمی كوردستان دادەنرێت، بە گوژمەی 480 ملیۆن دۆلار جێبەجێ دەكرێت، پرۆژەکە گەیشتووەتە گەڕەكەكانی دەرەوە و ناوەوەی سنووری 120 مەتریی هەولێر و دیوە ناوەوەی شەقامی 150 مەتری، لە مانگەکانی داهاتووشدا پڕۆژەکە تەواو دەبیت.

چیرۆکی سەرەکی: ئەمرۆ سێشەممە، 9-9-2025، شاندی ژووری بازرگانیی ئەمریکی و کۆمپانیا ئەمریکییەکان سەردانی پرۆژەی فریاگوزاریی خێرای ئاوی هەولێریان کرد، سەرۆکی شاندەکە سەرسامی خۆی بۆ پڕۆژەکە دەربڕیوە.

لێدوانی فەرمی: خالید خۆشناو، خاوەنی هێمن گرووپ بە ئاڤای ڕاگەیاند: سەرۆکی ژووری بازرگانیی ئەمریکا پێی وتم، "ئەگەر پڕۆژەی فریاگوزاریی خێرای گەیاندنی ئاوی هەولێر لە ئەمریکا بووایە و لەلایەن باشترین کۆمپانیاوە جێبەجێ کرابا، ئەوا بە حەوت ساڵ تەواو دەبوو، بەڕاستی لە هەرێمی کوردستان کۆمپانیای زۆر باش هەیە".

لەلایەکی دیکەوە: خالید خۆشناو وەڵامی سەرۆکی ژووری بازرگانیی داوەتەوە و پێی وتووە: خۆشەویستی ئێمە بۆ حکومەتی هەرێمی کوردستان ئەوەیە بتوانین 24 کاتژمێر کار بکەین، خزمەتی هاونیشتمانیان بکەین و ئاو بگاتە شاری هەولێر.

باکگراوند: ڕۆژی یەكشەممە، 08-09-2024، مەسرور بارزانی، سەرۆکوەزیرانی کوردستان، بەردی بناغەی پڕۆژەی فریاگوزاریی خێرای گەیاندنی ئاو بۆ شاری هەولێر دانا.