کۆنفرانسی "وەبەرهێنان لە کوردستان" لە ئیمارات بەڕێوەدەچێت

ئاڤا نیوز

 

شاندێکی دەستەی وەبەرهێنانی هەرێمی کوردستان گەیشتە ئیمارات و بە بەشداریی ژمارەیەک کۆمپانیای وڵاتەکە، کۆنفرانسێکی تایبەت بە وەبەرهێنان لە کوردستان بەڕێوەدەچێت.

 

وێنە گەورەکە: کەرتی وەبەرهێنان لە هەرێمی کوردستان دەبووژێتەوە و بەرەوپێشچوونی زیاتر تۆمار دەکات، کۆمپانیا گەورەکانی جیهان و وڵاتانی ناوچەکەش بۆ وەبەرهێنان لە پڕۆژەکانیان ڕوو لە کوردستان دەکەن، لەم چوارچێوەیەشدا ئەمڕۆ چوارشەممە کۆنفرانسێکی تایبەت بە وەبەرهێنان لە هەرێمی کوردستان لە ئیمارات بەڕێوەدەچێت. 

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤای وت: لە کۆنفرانسەکەدا زیاتر لە 21 کۆمپانیای ئیماراتی لە سێکتەرەکانی کشتوکاڵ، پیشەسازی و وزەی نوێبووەوە و چەند سێکتەرێکی دیکە بەشداریی دەکەن، کۆنفرانسەکە بە پاڵپشتیی ڕێکخراوی دراوی نێودەوڵەتییە و سیمیناری تایبەت بە وەبەرهێنان لە هەرێمی کوردستان ساز دەکرێت.

 

بە گوتەی بەرگەشت ئاکرەی، شاندەکەی هەرێمی کوردستان بە سەرۆکایەتیی د. محەممەد شوکری، سەرۆکی دەستەی وەبەرهێنانە و چەند کۆبوونەوەیەکی تایبەتیان لەگەڵ کۆمپانیا ئیماراتییەکان دەبێت.

 

گۆشەیەکی دیکەی دیمەنەکە: دەستەی وەبەرهێنان دەیەوێت وەبەرهێنەر و وەبەرهێنانی وڵاتی ئیمارات زیاتر ئاشنای دەرفەتەکانی وەبەرهێنان بن لە هەرێمی کوردستان، تاوەکوو پرۆژەکانیان بهێننە کوردستان و سەرمایەکانیان لێرە بخەنە گەڕ.

 

بۆچی گرنگە: بە هاتنی سەرمایەدار و وەبەرهێنانی وڵاتە بیانییەکان بۆ هەرێمی کوردستان، ئابووریی ناوچەکان زیاتر دەبووژێتەوە و کوردستان زیاتر بە ڕووی جیهاندا دەکرێتەوە، هەروەها سەدان هەلی کار بۆ هاونیشتمانیان دەڕەخسێنێت، چونکە مەرجە لەسەر هەر پرۆژەیەک 75٪ دەستی کاری خۆماڵی بێت.