ئەو گەنجە کوردانەی لە لیبیا ئازادکران گەیشتنەوە هەرێمی کوردستان

ئاڤا نیوز

 

بەرەبەیانیی ئەمڕۆ چوارشەممە 10/9/2025، ئەو 25 گەنجە کوردەی لە ماوەی ڕابردوودا لە لیبیا ئازادکران، لەڕێگەی فڕۆکەخانەی نێودەوڵەتیی هەولێر گەیشتنەوە هەرێمی کوردستان. 

 

چیرۆکی سەرەکی: بەشێکی زۆری ئەو گەنجانەی لە هەرێمی کوردستان و وڵاتانی ڕۆژهەڵاتی ناوەڕاست و کیشوەری ئەفریقیا ڕوو لە ئەوروپا دەکەن، هەوڵ دەدەن لە ڕێگەی وڵاتی لیبیاوە بگەن بە کەناراوەکانی وڵاتی ئیتالیا، 25 کوردیش ئەو ڕێگەیان بەکارهێنابوو و لە وڵاتی لیبیا دەستگیر کرابوون، دوای ئازادکردنیشیان ئەمڕۆ لە ڕێگەی فرۆکەخانەی نێودەوڵەتیی هەولێر گەڕێنرانەوە کوردستان.

لێدوانی فەرمی: سروە ڕەسووڵ، بەڕێوەبەری گشتیی ناوەندی هاوبەشی هەمەهانگی قەیرانەکان لە وەزارەتی ناوخۆی هەرێمی کوردستان گوتی: دوای پەنجا ڕۆژ مانەوەی ئەو گەنجانە لە گرتووخانەکانی وڵاتی لیبیا، فەرمانگەی پەیوەندییەکانی دەرەوە و هەڵسووڕێنەری کاروباری باڵیۆزخانەی عێراق لە لیبیا، توانیان گەنجە دەستگیرکراوەکان بدۆزنەوە و ئازادیان بکەن و پاسپۆرتیان بۆ دابین بکەن، سەرۆکوەزیران مەسرور بارزانیش ئەرکی گەڕاندنەوەی ئەو گەنجانەی لە ئەستۆ گرت.

 

باکگراوند: ئەو گەنجانە ڕۆژی یەکشەممە 2025-06-29 لەڕێگەی فڕۆکەخانەی نێودەڵەتیی هەولێر و فرۆکەخانەی بەغدا گەشتیان کردووە، هەموویان لە قاهیرەی پایتەختی میسر دابەزیون، لە 30ـی مانگ چوونەتە بەنغازی لە لیبیا، لە 1/7/2025 بەرەو تەرابلوس بەڕێکەوتوون، لە نێوان میسراتە و ئەلخومس دەستگیر کراون، بەهۆی 'لۆکەیشنی سەر ئەپل ئایدی' زانیویانە لە ئاسایشی گشتیی تەرابلوس ڕاگیراون.