ئەنەکەسە داوای کاراکردنی لیژنەی دانوستانکاری کورد دەکات

ئاڤا نیوز
 
ئەنەکەسە دەڵێت، پابەندن بە بڕیارەکانی کۆنفرانسی یەکڕیزی و یەکهەڵوێستی کورد لە ڕۆژئاوای کوردستان و داوای کاراکردنی کارەکانی لیژنەی دانوستانکاری کوردیش لەگەڵ دیمەشق دەکەن، تا وەک مەرجەعییەتێکی باڵا بتوانێت بڕیاری چارەنووساز بدات.

وێنە گەورەکە: هەرچەندە زیاتر لە سێ مانگە لیژنەی دانوستانکاری کورد لەگەڵ حکومەتی سووریا پێکهێنراوە بەڵام لیژنەکە هیچ کۆبوونەوەیەکی ئەنجامنەداوەو سەردانی دیمەشقیشی نەکردووە، پەیوەندییەکانی دیمەشق و ئیدارەی خۆسەریش بەرەوپێشچوونێکی ئەوتۆی بەخۆیەوە نەدیووە و ڕێککەوتنەکەی نێوانیان مەترسی هەڵوەشاندنەوەی لەسەر دروستبووە. 

ڕاگەیێنراوی فەرمی: ئەنجوومەنی نیشتیمانی کورد لە سووریا (ئەنەکەسە) ڕۆژی شەممە لە قامیشلۆ کۆبووەوە و ئاماژەی بەوەشكردووە، پێویستە گفتوگۆ و دانوستانی ڕاستەقینە لەنێوان دیمەشق و کورد بکرێت بۆ گەرەنتی چارەسەرێکی دادپەروەرانەی دۆزی کورد لە سووریا و دیاریکردنی شێوە و ناسنامەی دەوڵەت لە داهاتوودا، لەو چوارچێوەیەشدا ئەوان جەخت لە پابەندبوون بە بڕیارەکانی 26ی نیسان (کۆنفرانسی یەکڕیزی و یەکهەڵوێستی کورد لە ڕۆژئاوای کوردستان) دەکەنەوە، داواش دەکەن شاندی هاوبەشی کوردی کارا بکرێت و بۆ دەرکردنی بڕیارە گرنگەکان، وەک مەرجەعییەتێکی باڵا مامەڵەی لەگەڵدا بکرێت.

ئەوەشی خستووەتەڕوو، جەخت لە بەردەوامی هەماهەنگیی و کار هاوبەش لەنێوان هەموو پیكهاتەکانی سووریا دەکەنەوە ئەویش بە ئامانجی بەدیهێنانی خواستی هەمووان لە دەوڵەتێکی دیموکراسی فرەڕەنگ کە هەموو پێکهاتەکان لەخۆبگرێت.