ئەمریکا هاوکارییەکانی بۆ پێشمەرگە زیاد دەکات

ئاڤا نیوز

پڕۆژەیاسای بودجەی تەرخانکراو بۆ وەزارەتی جەنگی ئەمریکا لە ئەنجوومەنی نوێنەرانی ئەمریکا پەسەندکرا، ئەمریکا هاوکارییە سەربازییەکانی بۆ پێشمەرگە زیاد دەکات.

چیرۆکی سەرەکی: لە چوارچێوەی سندووقی ڕاهێنان و پڕچەککردنی دژ بە داعش، پێنتاگۆن پشتیوانییەکانی بۆ هێزی پێشمەرگە زیاد دەکات.

بەپێی پڕۆژە یاساکە، بڕی 61 ملیۆن و 14 هەزار و 940 دۆلار بۆ پێشمەرگە تەرخانکراوە، کە ئەمەش لەو بڕە زیاترە کە لە بودجی ساڵی 2025 بۆ پێشمەرگە تەرخانکرابوو کە 57 ملیۆن و 792 هەزار و 529 دۆلارە.

زانیاریی بەدەستهاتوو: ئەم بڕە بودجەیە بۆ مەشق و ڕاهێنان و دابینکردنی کەرەستە و چەکی پێویست بۆ هێزی پێشمەرگە خەرج دەکرێت. لەو بڕەش، 17 ملیۆن و 106 هەزار دۆلاری بۆ جلوبەرگ و کەرەستەی خۆپارێزی تەرخانکراوە.

زانیاریی زیاتر: لە پڕۆژەیاساکەدا ئاماژە بەوەدراوە کە وەزارەتی پێشمەرگە سێ سەنتەری مەشق و ڕاهێنان، کۆلێژێکی مەشقی ئەفسەران، دوو فەرماندەیی هێزی پشتیوانی، و چەندین یەکەی لۆجستی دادەمەزرێنێت. بۆ جێبەجێکردنی ئەم گۆڕانکاری و چاکسازییانە، وەزارەتی پێشمەرگە پێویستی بە پشتگیریکردن لە ڕووی چوارچێوەی هەڵسەنگاندن و مەشقی هاوپەیمانان هەیە. ئەم هەوڵانە ئامانجیان بەرزکردنەوەی توانای ئۆپەراسیۆنی وەزارەتی پێشمەرگەیە بۆ دڵنیابوون لە تێکشکاندنی هەمیشەی داعش.

لەلایەکی دیکەوە: بۆ ساڵی 2026 ئەمریکا لە هاوکارییەکانی بۆ هێزەکانی سووریای دیموکرات، هەسەدە بەردەوام دەبێت و 130ملیۆن دۆلاری بۆ تەرخانکردوون، بەڵام ئەم بڕەکە بەراورد بە ساڵی ڕابردوو کەمکراوەتەوە.

هاوکات لە پڕۆژەیاساکەدا هاوکارییەکانی ئەمریکا بۆ سوپای عێراق کەمیکردووە، پێنتاگۆن 48 ملیۆن و 419 هەزار دۆلاری بۆ هاوکاریکردنی وەزارەتی بەرگریی عێراق تەرخان کردووە. ئەو بڕەش بەراورد بە ساڵی 2025، 141 ملیۆن دۆلار کەمی کردووە. ، کە ساڵی ڕابردوو زیاتر لە 189 ملیۆن دۆلار بووە.