کۆبوونەوەی چوارچێوەی هەماهەنگی بێ سوودانی بەڕێوەچوو

ئاڤا نیوز

ڕۆژی دووشەممە، چوارچێوەی هەماهەنگی نیگەرانی خۆی دەربڕی سەبارەت "تووندکردنی گوتاری تائیفی"، هاوکات پابەندبوونی خۆی بە ئەنجامدانی هەڵبژاردنەکان لە وادەی خۆیدا دووپاتکردەوە.

وێنە گەورەکە: ئێوارەی ڕۆژی دووشەممە، سەرکردەکانی هاوپەیمانیی چوارچێوەی هەماهەنگی بەبێ ئامادەبوونی محەممەد شیاع سوودانی لە نووسینگەی حەیدەر عەبادی، سەرۆکی هاوپەیمانیی نەسر کۆبوونەوەی ئاسایی هەفتانەی خۆیان ئەنجامدا، کۆبوونەوەکە تەرخانکرابوو بۆ گفتوگۆکردن لەسەر بارودۆخی ئێستای عێراق و ناوچەکە.

ڕاگەیێنراوی فەرمی: بەپێی ڕاگەیێنراوی چوارچێوەی هەماهەنگی، نیگەرانی خۆیان لە "پەرەسەندنی گوتاری تائیفی لە هەندێک وتار و لێدواندا" دەربڕیوە، هۆشداریشیانداوە لە "کاردانەوەی مەترسیدارەکانیان لەسەر ئاشتیی کۆمەڵایەتی و یەکێتیی نیشتمانی".

سەرکردەکانی هاوپەیمانیەتییەکە تاوتوێی دەرئەنجامەکانی لووتکەی نائاسایی عەرەبی و ئیسلامی کرد کە لە دەوحە بەڕێوەچوو.

لە ڕاگەیێنراوەکە هاتووە، بەشداربووانی کۆبوونەوەکە جەختیان لە گرنگی بەدواداچوونی حکومەتی عێراق بۆ ئەو دەرەنجامانە کردووە هاوکات کارکردن بۆ جێبەجێکردنیان لەسەر ئاستی نێودەوڵەتی و ناوچەییدا بۆ سنووردارکردنی ئەو پێشێلکارییە بەردەوامانەی کە ئیسرائیل بەرامبەر بە گەلی فەڵەستین ئەنجامیان دەدات.