بۆ سێیەم جار کۆبوونەوەی پەرلەمانی عێراق پەکی دەکەوێت

ئاڤا نیوز

بۆ سێیەم ڕۆژ لەسەر یەک، بەشێکی زۆر لە ئەندامانی پەرلەمانی عێراق ئامادەی دانیشتنی پەرلەمان نەبوون، ئەمەش وایکرد ژمارەی یاسایی تەواو نەبێت و کۆبوونەوەکە بۆ هەفتەی داهاتوو دوابخرێت.

چیرۆکی سەرەکی:  بڕیار بوو ڕۆژی دووشەممە 2025-09-15، پەرلەمانی عێراق بۆ دەنگدان و گفتوگۆکردن لەسەر حەوت پرۆژە یاسا کۆببێتەوە ، بەڵام بەهۆی نەبوونی نیسابی یاساییەوە کۆبوونەوەکە بۆ ڕۆژی دواتر دواخرا و بەهەمان هۆکاریش ئەمڕۆ چوارشەممە دانیشتنەکەی پەرلەمان شکستی هێنا، بەمەش دەنگدان و گفتوگۆکردن لەسەر 18 پڕۆژەیاسا دواخرا.

ڕاگەیێنراوی فەرمی: فەرمانگەی ڕاگەیاندنی پەرلەمانی عێراق بڵاوی کردەوە: وێڕای بانگهێشتی سەرۆکایەتی پەرلەمان بۆ ئامادەبوونی سەرجەم پەرلەمانتاران بۆ دانیشتنەکەی ئەمڕۆ، بەڵام بەشێکی زۆریان ئامادەنەبوون کۆبوونەوەکەش بۆ هەفتەی داهاتوو دواخرا.

لەلایەکی دیکەوە: محەممەد عەنوز، ئەندامی لیژنەی یاسایی لە ئەنجوومەنی نوێنەرانی عێراق، ڕەخنەی تووندی لەو پەرلەمانتارانە گرت کە دانیشتنەکانی پەرلەمانیان پەکخستووە و وتی،"ئەمە سوکایەتیکردنێکی ڕوونە بە بەرپرسیارێتی نوێنەران لەبەردەم گەلدا"