بانکی فیدراڵیی ئەمریکا ڕێژەی سووی بانکی کەم کردەوە

ئاڤا نیوز

بانکی ناوەندی ئەمریکا بۆ یەکەمجار لە ئەمساڵدا ڕێژەی سوودی دابەزاند، دوای ئەوەی چەندین جار دۆناڵد ترەمپ سەرۆکی ئەمریکا داوای کردبوو ڕێژەکە کەم بکرێتەوە.

چیرۆکی سەرەکی: بانکی ناوەندی ئەمریکا بە ڕێژەی 25 خاڵ ڕێژەی سوودی کەمکردەوە، ڕێژەی سوود لە سەدا 4 بۆ سەدا 4.25 جێگیر کراوە، پێشتر لەنێوان 4.25 بۆ 4.50 بوو.

دۆناڵد ترەمپ لەسەر ئەم بابەتە چەندین جار جیرۆمی پاوڵی، پارێزگاری بانکی ناوەندی ئەمریکای بە کەسێکی لاواز وەسفکردووە کە ناتوانێت بە باشی کارەکەی بکات و ڕێژەی سوود کەمبکاتەوە، تا کار گەیشتە ئەوەی هەڕەشەی دەرکردنی لە پۆستەکەی لێکرد.

ئەوەی پێویستە بیزانیت: بە سەرۆکایەتیی جیرۆم پاوڵ، لە ئەمساڵدا بانکی ناوەندی ئەمریکا ڕێژەی سووی بانکییان بە جێگیری هێشتەوە بۆ ئەوەی کاریگەرییەکانی باج، تووندکردنەوەی جێبەجێکردنی یاساکانی کۆچ، و سیاسەتەکانی دیکەی ئیدارەی ترەمپ لەسەر هەڵاوسان و ئابووری هەڵسەنگێنن و ئەم هەنگاوەشیان بۆ ئەوەنا تاوەکو بازاڕی کاری ئەمریکا دووبارە ببوژێتەوە.

ئەوەی ئێستا ڕوودەدات: بەرپرسانی بانکی ناوەندی ئەمریکا ئاماژەیان بەوەدا کە چاوەڕوان دەکرێت لە ئەمساڵدا دوو جاری دیکە ڕێژەی سوود دابەزێنن.

کاریگەری و لێکەوتەکان: نرخی زێڕ دوای بڕیارەکە گەیشتە سێ هەزار و 707 دۆلار، بەڵام  دواتر دابەزی بۆ سێ هەزار و 659 دۆلار ، بەهای نەوت و دراوە دیجیتاڵییەکان و پشکی کۆمپانیاکانیش دابەزین.