پڕۆژەی فریاگوزاریی خێرای گەیاندنی ئاوی هەولێر دەگاتە گەڕەکەکانی شاوێس و پیرزین

ئاڤا نیوز

 

کارەکانی پڕۆژەی فریاگوزاریی خێرای گەیاندنی ئاوی هەولێر بەردەوامە، بەم زووانە پرۆژەکە دەگاتە هەردوو گەڕەکی پیرزین و شاوێس لە ڕۆژئاوای شاری هەولێر.

 

وێنە گەورەكە: پڕۆژەی فریاگوزاریی خێرای گەیاندنی ئاوی هەولێر بە یەكێك لە پڕۆژە گرنگ و ستراتیژییەكانی كابینەی نۆیەمی حكومەتی هەرێمی كوردستان دادەنرێت، پڕۆژەکە بە گوژمەی 480 ملیۆن دۆلار جێبەجێ دەكرێت و ئێستا گەیشتووەتە گەڕەكەكانی دەرەوە و ناوەوەی سنووری 120 مەتریی هەولێر و دیوی ناوەوەی شەقامی 150 مەتری، لە مانگەکانی داهاتووشدا سەرجەم کارەکانی پڕۆژەکە تەواو دەکرێن.

 

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای ڕاگەیاند: بەم زووانە هێڵە سەرەکییەکانی پڕۆژەی ئاوی فریاگوزاریی خێرای گەیاندنی ئاوی هەولێر بە تۆڕەکانی ئاو لە گەڕەکەکانی شاوێس و پیرزین دەبەسترێنەوە، لەگەڵ ئەوەشدا تۆڕی ئاوی ئەو گەڕەکانە بە تەواوی ڕێک دەخرێنەوە. 

 

زانیاریی زیاتر: بەگوتەی بەڕێوەبەری گشتیی ئاو و ئاوەڕۆ، زیاتر لە 90٪ کارەکانی پڕۆژەی ئاوی فریاگوزاریی خێرای گەیاندنی ئاوی هەولێر تەواو بووە، لە سەرەتای مانگی 12ـی ئەمساڵیشدا لە 100٪ پڕۆژەکە تەواو دەبێت.

 

بۆچی گرنگە: بە جێبەجێکردنی پڕۆژەی فریاگوزاریی خێرای گەیاندنی ئاوی هەولێر، کێشەی کەمئاوی بۆ زیاتر لە 30 ساڵی دیکە لە شارەکە چارەسەر دەکرێت و هاونیشتمانیان هیچ گرفتێکیان نابێت.

 

باکگراوند: لە ڕێککەوتی 8-9-2024، سەرۆکوەزیران مەسرور بارزانی، بەردی بناغەی پڕۆژەی فریاگوزاریی خێرای گەیاندنی ئاوی بۆ شاری هەولێر دانا، پڕۆژەکە لە ناحیەی کەورگۆسک لەسەر زێی گەورە بە گوژمەی نزیکە 480  ملیۆن دۆلار جێبەجێ دەکرێت.