هەرێمی كوردستان و عێراق ڕۆتینێكی بەردەم كۆمپانیاكان ناهێڵن

ئاڤا نیوز

لە ساڵی نوێوە، ڕێكارەكانی كردنەوەی لقی كۆمپانیاكانی هەرێمی كوردستان لە بەغدا و شارەكانی دیكەی عێراق لەلایەك و، متمانەی بەراییەكانی كۆمپانیاكان لە سەرجەم عێراق لەلایەكی دیكەوە، بە ئەلیكترۆنی دەكرێت؛ وەبەرهێنەران دەتوانن تەنها بە یەك سەردانیكردنی بەغدا، كارەكانیان ڕایی بكەن و تەواوبكەن.

 

وێنە گەورەكە: لەچوارچێوەی هەوڵەكانی بەڕێوەبەرایەتیی گشتیی تۆماركردنی كۆمپانیاكان لە هەرێمی كوردستان، بۆ پاڵپشتیكردنی وەبەرهێنەران و كۆمپانیاكان و هاندانی كەرتی تایبەت و چارەسەركردنی ئەو گرفتانەی ڕووبەروویان دەبێتەوە، بەهەماهەنگی لەگەڵ فەرمانگەی تۆماركردنی كۆمپانیاكانی حكومەتی فیدڕاڵ و نوێنەرایەتیی حكومەتی هەرێمی كوردستان لە بەغدا، هەنگاوەكانی بەئەلیكترۆنیكردنی ڕاییكردنی مامەڵەكان، چڕكردووەتەوە. بۆ ئەم مەبەستەش ئەمڕۆ پێنجشەممە 18ـی ئەیلوولی 2025، كۆبوونەوەیەكی فراوان لە شاری بەغدا بەڕێوەچوو.

لێدوانی فەرمی: بڵند محەممەد، بەڕێوەبەری گشتیی تۆماركردنی كۆمپانیاكان ڕایگەیاند، سەرەڕای ئەوەی بەشێك لە ڕێكارەكان بەئەلیكترۆنی كراون، ئێستا ئامادەكارییەكان بۆ بەئەلیكترۆنیكردنی سەرجەم ڕێكارەكانی لق و متمانەی بەراییەكانی كۆمپانیاكانی هەرێمی كوردستان لە بەغدا و بەپێچەوانەوە، دەستیپێكردووە؛ بەشێوەیەك وەبەرهێنەران بتوانن تەنها بە یەك سەردان، كارەكانیان جێبەجێ بكەن.

زانیاریی زیاتر: لە كۆبوونەوەكەی ئەمڕۆی شاری بەغدا كە لەنێوان تیمە تەكنیكییەكانی بەڕێوەبەرایەتیی گشتیی تۆماركردنی كۆمپانیاكان لە هەرێمی كوردستان و فەرمانگەی تۆماركردنی كۆمپانیاكانی حكومەتی فیدڕاڵ و نوێنەرایەتیی حكومەتی هەرێمی كوردستان لە بەغدا بەڕێوەچوو، پێشنیاز كرا كۆبوونەوەی زیاتر بكرێت بۆ بەشداریپێكردنی لایەنە پەیوەندیدارەكانی دیكە، لەپێناو جێگركردنەوەی سەرجەم ئەو ڕێكار و داواكارییانەی كە پەیوەندییان بە كاروباری كۆمپانیاكانی هەرێمی كوردستان و عێراقەوە هەیە.