عەبادی: کوردستان و نەتەوەیەکگرتووەکان لەبارەی سەرهەڵدانی داعش هۆشدارییان بە حکومەتی عێراق دابوو

ئاڤا نیوز

سەرۆکوەزیرانی پێشووتری عێراق دەڵێت، ساڵی 2014 و چەند ڕۆژێک پێش سەرهەڵدانی داعش، بەرپرسێکی نەتەوەیەکگرتووەکان و بەرپرسانی هەرێمی کوردستان هۆشدارییان لەپیلانی داعش دابوو و لە وەڵامدا بەرپرسانی ئەوکاتی حکومەتی فیدڕاڵ وتبوویان "ئێوە گرنگی بە کاری خۆتان بدەن و پەیوەندییتان بەم بابەتەوە نەبێت".

وێنە گەورەکە: ساڵی 2014 و لەسەردەمی ویلایەتی دووەمی نوری مالیکی، سەرۆکوەزیرانی ئەوکاتی عێراقدا، داعش سەریهەڵدا و یەک لەسەر سێی خاکی عێراقی داگیرکرد، لە ئەنجامیشدا ملیۆنان هاووڵاتی ئاوارەبوون و هەزارانیش کوژران، ئەوەش بە یەکێک لە قورسترین پێشهاتەکانی عێراقی دوای ساڵی 2003 هەژمار دەکرێت سەرەڕای ئەوەی تائێستا ئەوانەی لە سەرهەڵدانی ئەم ڕێكخراوە تاوانباربوون، سزانەدراون و تاوانباری سەرەکی کەوتنی شارەکانی عێراقیش بەدەستی داعش دیارینەکراوە.

لێدوانی فەرمی: حەیدەر عەبادی، سەرۆکوەزیرانی پێشووتری عێراق لە چاوپێکەوتنێکدا لەگەڵ کەناڵی دیجلە ئاماژەی بەوەشکرد، "لەکاتی کۆبوونەوەمدا لەگەڵ بەرپرسێکی نەتەوە یەکگرتووەکان و بەرپرسانی هەرێمی کوردستان پێیان وتم کە سەرۆکی ئەوکاتی حکومەت و بەرپرسانی دیکەی عێراقیان ڕاگەیاندووە کە داعش پیلانێکی لەو شێوەیەی هەیە، لە وەڵامیشدا بەرپرسانی عێراق پێیان وتووین ئێوە گرنگی بە کاری خۆتان بدەن و پەیوەندییتان بەم بابەتەوە نەبێت".

عەبادی دەشڵێت، ئەوکاتە بەرپرسانی عێراق بەهۆکاری ئەوەی هەرێمی کوردستان خواستی کۆنتڕۆڵکردنی خاکی هەیە و نەتەوە یەکگرتووەکانیش دەیەوێت بۆ  سازشکردن بەغدا بترسێنێت، گوێیان بە داواکارییەکان نەداوە واتە ململانێکان بوونەهۆی ئەوەی خەڵک و وڵاتیش زیانێکی گەورە بکەن.