ئەمڕۆ حەوت وەزیری حکومەتی عێراق لە پەرلەمان دەبن

ئاڤا نیوز

بەمەبەستی گوێگرتن لە کێشەی هاووڵاتیان و داواکارییەکانیان و وەڵامدانەوەی پرسیاری پەرلەمانتاران، ئەمڕۆ حەوت وەزیری حکومەتی عێراق لە پەرلەمان دەبن.

وێنە گەورەکە: پێشتر کە محەممەد حەلبووسی، سەرۆکی پەرلەمانی عێراق بوو ئەم نەریتە پەیڕەوکرا کە لە جێگەی ئەوەی پەرلەمانتاران بە گرووپی بچووک بچووک بچنە وەزارەتەکان، لەو ڕۆژانەی کۆبوونەوەی پەرلەمان هەیە وەزیرەکان بێنە کافتریای پەرلەمان و ڕاستەوخۆ وەڵامی داواکارییەکانی پەرلەمانتاران بدەنەوە کە کێشەی خەڵکی لایە و لە پارێزگاکانیانەوە هێناویانن.

ڕاگەیێنراوی فەرمی: نووسینگەی نوێنەرایەتی حکومەتی عێراق لە پەرلەمان کارنامەی ئامادەبوونی وەزیرەکانی بۆ ڕۆژی یەکشەممە (21ی ئەیلوولی 2025)ـی بڵاوکردووەتەوە و بەگوێرەی کارنامەکەش ئەمڕۆ هەریەکە لە وەزیرانی بەرگری، نەوت، بازرگانی، پەیوەندییەکان، سەرچاوەکانی ئاو، کشتووکاڵ و سەرۆکی دامەزراوەی زیندانیانی سیاسی لە پەرلەمان ئامادە دەبن.

بۆچی گرنگە: پێشتر شێروان دووبەردانی، ئەندامی پەرلەمانی عێراق بە ئاڤا میدیای ڕاگەیاندبوو، لە کاتی ئامادەبوونی وەزیرەکان لەناو باڵەخانەی پەرلەمان، ئەوانیش وەک پەرلەمانتاران ئەو کێشە و داواکارییانەیان ڕووبەڕوو دەکەنەوە کە خەڵک ئاڕاستەی کردوون.