قۆناغی دووەمی پڕۆژەی فریاگوزاریی خێرای ئاوی هەولێر لە تەواوبووندایە

ئاڤا نیوز

کارکردن لە قۆناغی دووەمی پڕۆژەی فریاگوزاریی خێرای ئاوی هەولێر لە تەواوبووندایە و لەم قۆناغە 50%ـی دانیشتووانی شاری هەولێر سوودمەند دەبن.

وێنە گەورەکە: پڕۆژەی فریاگوزاریی خێرای ئاوی هەولێر یەکێکە لە پرۆژە ستراتیژییەکانی کابینەی نۆیەم، بە تەواوبوونی ئەم پڕۆژەیە کێشەی کەمئاوی تا 30 ساڵی داهاتوو لە هەولێر چارەسەر دەبێت، قۆناغی یەکەم کراوەتەوە و ئاو بە 32 گەڕەک گەیشتووە، لە قۆناغی دووەم 35%ـی پڕۆژەکە تەواو دەکرێت.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای گوت؛ "کارکردن لە وێستگە و هێڵە سەرەکییەکان لە قۆناغی تەواوبووندان، 65%ـی پڕۆژەکە کۆتایی مانگی 11 تەواو دەبێت و 50%ـی دیکەی دانیشتووانی شاری هەولێر کێشەی کەمئاویان چارەسەر دەبێت."

ئەمەش بزانە: قۆناغی دووەمی پڕۆژەی فریاگوزاریی خێرای ئاوی هەولێر بە سێ هێڵی سەرەکی دەبێت و 50 گەڕەک و ناوچەی سنووری پارێزگای هەولێر کە دەکەونە ناوەوەی 120 مەتری لێی سوودمەند دەبن.

باکگراوند: لە ڕێککەوتی 2024-09-08، سەرۆکوەزیران مەسرور بارزانی، بەردی بناغەی پڕۆژەی فریاگوزاریی خێرای گەیاندنی ئاوی بۆ شاری هەولێر دانا، پڕۆژەکە لە ناحیەی کەورگۆسک لەسەر زێی گەورە بە گوژمەی نزیکە 480  ملیۆن دۆلار جێبەجێ دەکرێت.