ئاڤای خەڵک؛ دانیشتووانی کۆمەڵگەی شاریا گرفتی کەمی قوتابخانەیان هەیە

ئاڤا نیوز

پەروەردەی شاریا لە پارێزگای دهۆک 10 قوتابخانەی هەیە، لەو ژمارە قوتابخانەیەش دوو هەزار قوتابی دەخوێنن ئەمەش گرفتی بۆ دروستکردوون و داوایان لە ئاڤا کردووە بەدواداچوونیان  بۆ بکات.

چیرۆکی سەرەکی: هەر لە کۆمەڵگەی شاریا ماوەی 13 ساڵ بڕیاری دروستکردنی قوتابخانەیەکی 18 پۆلی دراوە و دەست بە دروستکردنی کراوە، بەڵام تاوەکو ئێستا تەواو نەکراوە و بە نیوەچڵی جێهێڵدراوە. 

زانیاریی زیاتر: ئەو قوتابخانەی کە تەواو نەکراوە لە ساڵی 2012 بەردی بناغەی دانراوە و ملیاریک و 700 ملیۆن دیناری بۆ تەرخان کراوە و بە بەڵێندەرێک دراوە، بەڵام ساڵی 2014 کارەکانی ڕاگیراوە و بەڵێندەرەکە پڕۆژەکەی جێهێشتووە. لە مانگی سێی ئەمساڵ لەلایەن پارێزگای دهۆکەوە 700 ملیۆن دیناری دیکەی بۆ تەرخان کرا و بە بەڵێندەرێکی دیکە درا.
 
لێدوانی فەرمی: ڕەمەزان سەبرییە، جێبەجێکاری پڕۆژەکە بە ئاڤای گوت: ئێستا سەدا 70ی قوتابخانەکە تەواو بووە، بەڵام بەهۆی ئەوەی هیچ گوژمەیەکم بۆ خەرج نەکراوە کارەکانم ڕاگرتووە، ئەگەر حکومەت پارەم پێبدات بە دوو مانگ تەواوی دەکەم.

ئەوەی پێویستە بیزانیت: بۆ چارەسەر ئەم پرسە ئاڤا پەیوەندی بە ماجد سەید، جێگری پارێزگاری دهۆک کردووە، کاک ماجد دەڵێت: پارەی بۆ خەرج دەکرێت و بەمزووانە کارەکانی قوتابخانەکە دەستپێدەکاتەوە. بەدڵنیاییەوە لە وەرزی دووەمی خوێندنی ئەمساڵ قوتابیانی شاریا لە قوتابخانە نوێیەکە دەخوێنن.